Lada kwah weng ïa ka dheng kali ha Iewduh, weng shwa ïa kiba sah ha Them Iewmawlong: FKJGP

Shillong, Naiwieng, 01: Ka Federation of Khasi Jaiñtia and Garo People (FKJGP) Central Body ka la pyrshah jur ïa ka jingthmu jong ka Sorkar Jylla lyngba ka jingpyntip paidbah ba la pymnih na ka ophis jong ka Deputy Commissioner, East Khasi Hills District ha ka 30 tarik Risaw, ba yn plie noh ïa ka surok na Them Iew Mawlong sha Bimola naduh ka 4 tarik Naiwieng 2024.
“Kane ka jingleh jong ka Sorkar ka dei tang ka buit ban pynthame ïa ki paidbah nongshong shnong jong ka Bri u Hynñiewtrep ban pynslem shuh shuh ïa ka jingpynkynriah noh ïa ki briew kiba sah be-aiñ ha Them Iew Mawlong. Ki paidbah jong ka Bri u Hynñiewtrep da ki phew snem na ka por sha ka por ki la pynpaw ba la donkam ban pynkynriah noh mardor ïa ki briew kiba sah be-aiñ ha Them Iew Mawlong bad ki la ïai shah ruh haduh hynriew snem kynthih naduh u snem 2018 hadien ba la khangdam ïa ka surok na ka daw ba la mih ka jingïakynad hapdeng ki samla Khasi bad ki poiwir kiba sah kiba sah be-aiñ ha Them Iew Mawlong,’ ong u kyrwoh ba la phah da u Vice President ka FKJGP, Central Body u samla Kitboklang Nongphlang.
“Kum ka seng kam lah ban klet ba ki jingjia shah bom shah tied, ki jingshah lute, ka jingshah leh kynshleiñ bad shah leh khlem akor jong ki samla kynthei bad ki longkmie Khasi ha kitei ki jaka kiba ju jia na ka por sha ka por namarba ki briew kiba sah be-aiñ ha katei ka jaka ki ïoh leh thik kum ki khun khatduh jong ka Sorkar Jylla naduh ki por kiba mynshwa ha kaba wat kita ki bor jong aiñ ruh lada don kino kino ki jing jia ha kitei ki jaka ki ju ai jingïada pynban ïa ki poiwir ki bashong basah be-aiñ katba ïa ki trai ri trai muluk kiba dei ki Khasi pat ki kylla long ki langkñia,” ong u kyrwoh na ka seng bad bynrap, “wat hadien ba la khangdam ïa ka surok na Them Iew Mawlong sha Bimola hapdeng kine ki hynriew snem ruh la sakhi ïa kiba bun ki kam bymman kynthup ruh ïa ka jingïoh kem ïa ki nongdih bad ki nongkhaii drok bad kumta ter ter.”
Ka jingpynbna paidbah ba la pynmih da ka Sorkar Jylla lyngba ka ophis jong ka Deputy Commissioner, East Khasi Hills District ha ka 30 tarik, Risaw, 2024 ka dei kaba don jingïadei aiu re aiu sha lyndet. Kum ka seng kam lah satia ban pdiang ba ha ka order lane kata ka jingpyntip paidbah ban kdewshai lane ban pyndonkam da ka kyntien ‘Punjabi Lane’ ha ka jaka ban kdew lane thoh ‘Them Iew Mawlong’, la kynthoh ka seng.
Ka Seng ka buh ka jing kylli ïa ka Sorkar hato katei ka jingpynmih ïa ka kyntien ka dei pynban ka jingleh khnang ban pynskhem ïa ka jinglong trai jong ki poiwir kiba shong ba sah be-aiñ ha katei ka jaka?
Ka seng ka maham jur ïa ka Sorkar Jylla ba ka dei ban shim ïa ka jingkitkhlieh lada mih biang kino kino ki kynrum kynram bad ha kajuh ka por ka seng ka kyntu jur ïa ka Sorkar ba kam dei satia ban pynsngap ïa ki jingpyrshang ban tuklar bad mushlia da ki briew kiba na kiwei pat ki jylla ki bym tip satia ïa ka dang ka duh hynrei ba ka dei ban ïaid beit shakhmat ïa ka jingpynkynriah ïa ki briew kiba shong ba sah be-aiñ ha Them Iew Mawlong.
Ka seng hi ka sngew ba ka jingaidaw jong ka Sorkar ban weng ïa ka jingkhapngiah lane kata ka jingdheng kali ka dei tang ka daw ba kim mon satia ban pynkynriah namar lehse ki seng saiñhima ki shim kabu na ka bynta ka jingmyntoi ha ka kam saiñpyrthei.
“Lada ka sorkar ka thmu shisha ban pynkylluid ïa ka sor Shillong bad ban weng ïa ka jingdheng kali ha kitei ki jaka pdeng jong ka Iewduh ka la dei ban shim wut wut ïa ki sienjam ban pynkynriah mardor ïa ki briew kiba sah be-aiñ ha Them Iew Mawlong ym ban ai da ki daw kiba khlem nongrim ban shu pynthame kai ïa ki paidbah,” la kyntu ka Seng.
‘”Ka FKJGP ka kyntu jur ïa baroh 36 ngut ki MLA jong ka Bri u Hynñiewtrep ban ieng tylli mlon tad haduh ba ka jingangnud jong ki paidbah kaba pun da ki phewsnem kan urlong bad ban weng syndon ïa u shiah uba thar ïa ki para doh para snam jong ka Bri u Hynñiewtrep,” la bynrap shuh shuh u kyrwoh.