Jowai, Risaw 16: U District Magistrate ka West Jaiñtia Hills District u Abhinav Kumar Singh u la pynmih ïa ka hukum ha ka sngi Palei ba la weng noh shisyndon ïa ka korphiw miet hadien ba ka jingshong suk ha ki bynta jong ka Assam bad Meghalaya ka la wan phai biang.
Ka hukum ba la pynmih ka la weng shisyndon ïa ka hukum kaba la dep ban pynmih ha ka 9 tark bad 14 tarik mynta u bnai halor ka jingpynjari korphiw miet ha ki bynta khappud ka Assam bad Meghalaya.
Hynrei ha kaba ïadei bad ka shnong Lapangap bad ki thaiñ ba marjan u District Magistrate u la pyntip ba yn dang pyntreikam ïa ka jingpakhang korphiw hapoh ka Section13 BNSS, na ka bynta ban wanrah ïa ka shongsuk shongshngaiñ hapoh ka thaiñ.
Kumta kane ka hukum, la khang ïa ka leit ka wan jong ki briew ha ka thaiñ Lapangap, West Jaintia Hills District, la khang ïa ka jingïalum briew kaba palat ia ka san ngut bad la khang ruh ban rah ïa kino kino ki tiar pynmynsaw.
Kane ka hukum kan treikam noh mardor naduh ba la pynmih tad haduh ban da pynbna da kumwei pat, la pyntip u District Magistrate ka West Jaiñtia Hills.
