New Delhi, Jylliew 24: Ka elekshon ban jied ïa u Lamphang ne Speaker ka Parliament ne ka Ïing dorbar kaba 18 jong ka Lok Sabha kan long ha ka sngi Balang ka 26 tarik u Jylliew, 2024 kane ka long katkum ka kyrwoh jong ka Lok Sabha.
Ka President jong ka Ri India ka Droupadi Murmu kan ai ïa ka jingkren jong ka ha ka jingïashong dorbar lang ki MP jong ka Lok Sabha bad Rajya Sabha ha ka 27 tarik u Jylliew, 2024.
Ka President ka la thung ïa u Bhartruhari Mahtab kum u Protem Speaker ban pynïaid ïa ka ïing dorbar shipor, ban pynbam smai ïa ki dkhot ka ïing dorbar katba ym pat ïoh ïa u Lamphang bapura jong ka ïing dorbar Thaw aiñ ka Lok Sabha.
Ka jingpynsmai ïa ki dkhot ka ïing dorbar kaba thymmai ka la sdang mynta ka sngi da ka jingbam smai jong u Protem Speaker kaba la pyndep da ka President, katba ïa ki dkhot ka ïing dorbar la pynsmai nyngkong ïa u Myntri Rangbah duh jong ka Ri India bad kane ka jingpynbam smai kan dang bteng bad pyndep mynta ka sngi.
La khmih lynti ba kane ka jingshong dorbar kaba nyngkong jong ka ïing dorbar kaba 18 jong ka Lok Sabha lada ka sorkar kam don eiei ban wanrah kan kut ha ka 3 tarik u Naitung, 2024.
