La shu kren laplah u CEM ka KAADC halor ka Mukroh, lada tei mot ngan ïalam ban pynpra: Bah Banteidor

Shillong, Naiwieng 30 : U Myntri ka tnad Sport and Youth Affairs bad Agriculture u bah Banteidor Lyngdoh uba dei ruh u MLA ka Mawkynrew Constituency u la pynpaw ka jingsngew pyrshah jur halor ka jingkren laplah jong u CEM ka Karbi Anglong Autonomous District Council (KAADC) u Tuliram Ronghang uba la kynnoh ba ki jaidbynriew Pnar kiba sah ha Mukroh bad kiwei kiwei ki shnong Pnar ha Block I ki dei ki riew poi ei bad kiba la shu sah beaiñ ha kitei ki jaka.
U bah Banteidor u la ong ba kane ka jingkren jongu ka long kumba theh syndon da ka petrol ha ka ding namar nalor ba la shah siat iap san ngut ki mynsiem briew ha ki pulit Assam dang ha ka 22 tarik Naiwieng 2022 da kaba ki la wan rung beaiñ sha u pud u sam ka Meghalaya kata haduh shnong Mukroh mynta u Ronghang u kynnoh pat sa da kumne. Kane ka long kaba bakla bad kaba ym lah ban pdiang da lei lei ruh namar ki paid Pnar ki dei kiba la im la sah ha kitei ki jaka bad ki shnong jongki da ki spah snem ban ïa ka KAADC kaba dang mih dang tang ha u 1952 shaneng. Utei u CEM um tip ei ei ruh em ïa ki aiñ ki kanun u shu kwah ban kren pynshit.
“ Halor kane ka jingkren laplap utei u CEM nga la ïakren bad u Myntri Rangbah ka jylla u Conrad K Sangma bad u la kular ban shim khia ïa ka kam ban ïakren bad u Myntri Rangbah ka Assam u Himanta Biswa Sarma ba ym dei ban kren pynshit bad kren laplah nalor bym tip ïa ki jingshisha. U Myntri rangbah u la ong ruh ba un sa kren ei ei halor kane hadien ba u la wan poi na ri lum Garo hangne ha nongbah Shillong” ïathuh u bah Banteidor.
U la ong shuh shuh ba utei u CEM u dei ban pan map shisyndon halor katei ka jingkren bakla bad jingkynnoh bym don nongrim jongu ïaki paid Pnar.
“ Nga la ïohi ïa ka jingkren jongu ba u ong ban wan tei da u mot sah jingkynmaw ïa uto u Forest Guard ka Assam uba shah siat iap ha katei ka jaka , da lei lei ruh ngin ym ailad bad shah ïa kane bad lada jia ba ki tei jubor ngan ïalam ban leit pynpra ïa utei u mot namar na ka bynta ka jaidbynriew ngam salia nga buh ïa ka jaidbynriew hakhmat ïa ka shuki shadien” ong biang u ban Banteidor uba kren da kata ka mynsiem ieit ïa ka Ri bad ka Jaidbynriew.
U la ong ruh dei ka Assam kaba kyntur pud sha Meghalaya da kaba wan buh sa ïa ka Forest Camp hajan ka shnong Mukroh. U la ong ba utei u CEM u dei ban tip ba ka Shnong Mukroh ka don la u pud u sam ba la dep pynthikhna da ka JHADC bad ka biang ki kot ki sla ban pynshisha ba ka dei ka jong ka Meghalaya.