Kyntait ki heh nongïalam ka HNLC ban leit hajir hakhmat ka ïingbishar ka NIA

Shillong, Naiwieng, 30: Ka seng kieng atiar Hynñiewtrep National Liberation Council (HNLC) ha ka sngi Balang ka la ñiew ïa ka jingshah khot hajir ha ka National Investigation Agency (NIA) ka dei ka “bym lah satia ban pdiang” namarba ka jingïakren ïasuk hapdeng ka seng bad ka Sorkar ka dang ïaid shakhmat.
Kane ka long hadien ba u Special Judge jong ka NIA, Shillong u la phah da ka shithi hajir sha ki nongïalam jong ka HNLC.
Ki nongialam kiba la shah khot hajir ki long u General Secretary u Bah Saiñkupar Nongtraw, u Bah Marius Rynjah bad u Bah Bobby Marweiñ. Ia kine ki lai ngut ki nongialam ka NIA ka la pynngat hapoh ka Section 120 B/435/436 jong ka Indian Penal Code bad ka Section 3/5 jong ka Explosive Substance Act, 1908 bad ka Section 10 (B) (ii) /13 (i) jong ka UA (P) Act, 1967.
“Kane ka pynpaw shai ba ki bor synshar ki la ïaid lait ïa ki kyndon jong ka jingïakren ïasuk kaba la sdang,” ong u General Secretary ka HNLC u Bah Saiñkupar Nongtraw uba long ruh ha kajuh ka por u Publicity Secretary ha u kyrwoh ba la phah sha ki lad pathai khubor.
U la ong, hashwa ban pynsdang ïa ka jingïakren ïasuk hapdeng ka seng bad ka Sorkar Jylla bad Sorkar India, ka HNLC ka la kren da kaba shai ba dei ban weng lut ïa baroh ki mukotduma khnang ban pynthikna ba ki nongïalam kin don hapdeng ka jingshngaiñ ynda la pyntyllun ïa ka miej jingïakren ïasuk.
“Ka Sorkar ka la kular ba tang shu la sdang ka jingïakren, ki mukotduma kiba rim kin ym long mawjynthud bad kin ym pynwit satia ka jingïakren ïasuk. Ha ka jingshisha u Myntri Rangbah Conrad K.Sangma ryngkat bad u Myntri ka tnat Kam Pohing u Bah Lahkmen Rymbui ki la kren da kaba shai ba ki jingpynngat kyndon jong ka NIA kin ym ktah satia ïa ka jingïakren ïasuk. Ka jingkhot hajir ka long ka mat kaba pynsngewkhia namar haba ka jingïakren ïasuk ka la ïaid shakhmat hynrei kumno pat yn dang pynngat da ki mukotduma kiba thymmai pyrshah ïa ki nongïalam,” la ong u Bah Nongtraw.
“Kane ka pynpaw shai ïa ka jingleh arsap jong ka Sorkar, kaba la pynmih ïa ka jingartatien bad ka jingbym shahniah shuh ïa ka kam ba ladep ïakren,” la bynrap u Bah Nongtraw.
“Ka HNLC ka la kiar ban leh ïa ki kam pyntriem naduh ba la pynsdang ïa ka jingïakren ïasuk bad haduh mynta ngim shym la leh ïa kino kino ki kam kiba lah ban pynthud noh ïa ka jingïakren ïasuk,” u la ong.
“Ngi la shong jingïalang la bunsien bad ki Ophisar jong ka Ministry of Home Affairs (MHA) bad ka Sorkar Jylla. Haduh mynta, ngi la ïoh ka jingkular ban don beit ka jingïasuk, ka jingïasnohkti lang, ka jingïatreilang da ka Sorkar hynrei ka jingshah khot hajir mynta ka sngi kumba la paw ha ki lad pathai khubor ka long ka bym lah satia ban pdiang daleilei ruh em.