Pyni ksah sa u CEM ka JHADC ka Mukroh ka dei jong ka Meghalaya, shi inshi ruh yn ym ai sha Assam

Jowai, Naiwieng 30 : Hadien ka jingkren laplah jong u CEM ka Karbi Anglong Autonomous District Council (KAADC) u Tuliram Ronghang ha ki rynsan Social Media da kaba ong ba ki briew kiba sah ha ka shnong Mukroh bad kiwei kiwei ki shnong Pnar ha Block I ki dei ki poiwir na ka liang u CEM ka Jaintia Hills Autonomous District Council (JHADC) u ma Thombor Shiwat u la pyni ksah kylla ïa utei u Ronghang da kaba u ong ba ka Mukroh ka dei jongka Meghalaya bad shi inshi ruh yn ym ai ba kan leit sha Assam.
U ma Thombor u la ong “ Ym lah satia da lei lei ruh ban pdiang ïa katei ka jingkren laplah u Ronghang bad ka long kaba bakla. Namar kum ka Council kaba peit ïa ka khyndew ka shyiap ka shnong Mukroh ka dei ka shnong kaba la don ïa u pud u sam uba pura bad ka dei ka shnong ba la rim bha lem bad kito ki shnong pnar kiba la don ha ki jaka khappud kat kum ka Notification 1952 kiba dei ka Mukroh, Barato, Psiar, Khanduli bad ka Block-1. Nga kum u CEM uba don ka jingkitkhlieh na ka bynta kitei ki shnong kiba don ha khappud ngan pynthikna ba tang shi inshi ka jaka ruh kam dei ban leit sha Assam bad ha kane ka jingïapynbeit pud ka Meghalaya bad Assam ruh kitei ki jaka kim dei ban shah ktah da lei lei ruh namar ki la dei lypa ki jong ka Meghalaya”.
U la ong “Wat kito ki 36 tylli ki shnong jong ki Khasi Pnar kiba la tip ka Labang Nongphyllut Pangam Raliang ïa ki ruh ka Council kan ïaleh ban pynwan (retransfer) biang shapoh ka jylla Meghlaya namar wat ka Council ka don ïa ki kot ki sla (record) ban pynshisha”.
Ha ka juh ka por u kyntu ïa ki pulit Assam ba kim bit ban leh bor palat ïa ki nongshong shnong Khasi Pnar kiba don ha ki thaiñ khappud, ula pyntip ruh ba ka shnong Mukroh ka long kaba la dep ban pynskhem bad kaba la ïoh ka bor na ka District Council lyngba ka Sanad kaba don ïa ki ïew ki hat bad ki jaka pule puthi.
U ma T. Shiwat u kyntu jur ïa ki nongshong shnong kiba shong ba sah ha khappud ba kim dei ban tieng ne shong rit mynsiem namar ka Council kan ïaleh ban ai ka jingïada ïa ka khyndew ka shyiap katkum ka bor ka iktiar ban pynshisha ïa ki jaka ki puta jong ki. U kyntu ruh ïa ka sorkar jylla ba kan ai ka jingïada ïa ki nongshong shnong da kaba phah ïa ki pulit sha kitei ki shnong.