La rakhe ïa ka World Hepatitis Week 2024 ha Ladrymbai EJH

Khliehriat, Naitung, 26: Ka ophis jong u District Medical & Health Officer, East Jaiñtia Hills District mynta ka sngi ka la pynlong ïa ka prokram ba kyrpang kaba iadei bad ka World Hepatitis Week 2024 bad ïa ka prokram la pynlong ha shnong Ladrymbai Dongwah, ha kaba la ïa don ryngkat lang ka District Immunization Officer, East Jaiñtia Hills District, ka Dr. N. P. Suchiang, u Medical Officer in-charge jong ka Opioid Substitution Therapy (OST) Centre, Khliehriat, Dr. J. Nongtdu bad kiwei kiwei.
Haba kren ha ka jingialang ka Dr N. P. Suchiang ka la ong ba ka tnat ka koit ka khiah ka la pynlong ïa kane ka prokram ka long halor ka nongrim ban pynshai bad pynsngewthuh ïa ki paidbah ha kaba ïadei bad kane ka jingpang lane u khñiang jingpang (Virus) hepatitis, uba dei ruh u khñiang jingpang ba iabit bad ki briew ki donkam ban iada ban llait na ka jingsaphriang une u khniang jingpang khamtam u Hepatitis B & Hepatitis C.
Ka Dr Suchiang ka la batai ruh khyndiat halor ka rukom ban ai jingsumar ban lait na une u khñiang jingpang.
U Medical Officer in-charge Opioid Substitution Therapy (OST) Centre, Khliehriat, u Dr. J. Nongtdu u la batai halor kumno u khñiang jingpanag hepatitis u ioh ban rung ha ka met jong u briew bad ong ba une u khniang jingpang u ktah ia u liver, u la batai ruh ïa ki jiat jingpang Hepatitis, ki dak ba paw shabar lada u briew u don ïa kane ka jingpang, u la kyntu ruh ïa ki paidbah kiba swan sha kane ka jingialang ba kin pynphriang ïa kane ka khubor sha kiwei pat ki longiing bad sha ka imlang ka sahlang khnang ban dup lait na ka jingshah ktah ha une u khñiang jingpang.
Ha kane ka prokram la pynbna ruh da ki nongtrei ka tnat ka koit ka khiah ba ïa kane ka injek ne vaccination ban iada na ka jingpang Hepatitis yn sa ai ne leh ha Opioid Substitution Therapy (OST) Centre, Khliehriat ha ka 30 tarik mynta u bnai naitung 2024.