Williamnagar, Nohprah 12: Kum shi bynta ban ñiewtang ïa ki kam radbah bad ka jinglen lada jong u Pa Togan Nengminja Sangma u khla wait ki paid Garo ban ïakhun na bynta ka jinglait luid na ka kti jong ki Phareng ha ka sngi Nyngkong la pynlong ïa ka jingrakhe ïa ka lyngkhuh snem kaba 150 jong ka sngi ïap jong u ha Chisobibra kaba don marjan bad ka nongbah Williamnagar.
Ha kane ka sngi la wan shim bynta da u Myntri Rangbah ka jylla u Conrad K Sangma, u Chief Whip jong ka sorkar u Marcus N. Marak, u Chairman Meghalaya Transport Corporation ua dei ruh u MLA ka Rongjeng u Jim Sangma bad kiwei kwei ki kynrem ki lyndan.
Ha ka jingkren ha kane ka sngi u Myntri Rangbah ka jylla u la ong ba ki khla wait kiba ka jylla ka la sei ki dawa ba dei ban ïoh ka jingkynmaw ïa ki kam shlur bad ka jinglen lade jong ki na ka bynta ban ïoh ïa ka jinglaitluid na ka jingsynshar ki nongwei bad ong ruh ba ka dei ka kamram jong ka pateng mynta ban ai pateng ïa ki khna shlur jong ki sha ki longdien.
“Dei lyngba kum kine ki prokram ba ngin ïoh ban kynmaw ïa ki kam radbah jong kine ki khla wait sha ka jylla,” u la ong.
U la ong ruh ba dei ban pynlong ïa ki cross cultural exchange ne ka jingpyninam ïa la ki riti dustur ha kylleng ka jylla khnang ba ki khynnah kiba kham hadien kin tip shaphang ki khlawait ïaleh laitluid kiba na ka jylla.
Ha kane ka sngi u Myntri Rangbah u la pyllait ruh ïa stamp sah kynmaw na bynta une u khla wait.
U la pyntip ruh ba ka sorkar ka ka don ka jingthmu ban pynbha bad pynwandur thymmai Pa Togan Nengminja Sangma Memorial Park ha Chisobibra bad pyntip ruh ba ka sorkar ka la mang 50 lak ban pynbha noh bad ka jingpyntrei na bynta kane ka kam kan sdang noh hi shen.
Ha kane hi ka sngi u Myntri Rangbah u la plie ruh ïa u mawnongrim na bynta ban tei ïa ka jingkieng lyngba ka wah Rongon on Rongbing Boldak sha Chekwebibra ha ka jinglut kaba 7.81 klur bad ruh kumjuh ïa u mawnongrim na bynta ban pynbha bad pynheh ïa ka surok shnong ha Williamnagar ha ka jinglut kaba la mang 27 klur.
