La pynlong ïa ka Town Hall Meeting na ka bynta ki Nongri Ngap jong ka Tynnai Honey Cluster
Mawkyrwat, K’lyngkot, 27: Da ka jingthmu ban kner ka jingïarap sha ki nongri ngap jong ka Tynnai Honey Cluster kiba long kum ki Micro Small Medium Entrepreneurs, na ka liang ka Reserve Bank of India (RBI), Shillong ka la pynlong ïa ka Town Hall Meeting halor ki Micro Small and Medium Enterprises (MSMEs) ha Nativity Auditorium Hall, Mawkyrwat, South West Khasi Hills District.
Ha kane ka sngi la ïadonlang u bah Tableland Lyngwa, IAS, Deputy Commissioner ka South West Khasi Hills, u bah Olden Nongpluh, General Manager (O-i-C), RBI Shillong, Regional Manager-SBI, General Manager-MRB, ki nongtrei jong ka DCIC bad DIPR, ka sorkar Meghalaya, NABARD, SIDBI, MSME-DI, ki nongtrei jong ki banks kiba don ha ka distrik bad ki nongri ngap ka Tynnai Cluster.
U bah Tableland Lyngwa, IAS, Deputy Commissioner, South West Khasi Hills District uba la don lang ha kane ka jingïalang u la ong ba kane ka dei ka khubor kaba sngewtynnad bad ka kabu ksiar na ka bynta kito kiba don jingthmu ban seng ïa ki kam la jong da kaba pynshlur ïa ki ban shim ïa kane ka lad kaba long ha kajuh ka por ka kabu ksiar na ka bynta ban nang kham pynheh shuh shuh ïa ka seng ka dang jong ki.
U bah Olden Nongpluh, GM (O-i-C), RBI, Shillong, ha ka jingkren maitphang u la batai halor ka jingdonkam bad ka jingthmu jong kane ka Town Hall Meeting halor ka jingtreikam jong ka MSMEs ha ki unbank/underbanked bad kumno ban pynsngewthuh bad hikai ïa ki nongseng kam lajong ïa ki lad jingïarap ba ki ïoh lyngba ki banks da kaba pynïasoh ïa lade bad ki banks bad ha ka ban twad jingmut na ki nongseng kam lajong halor ki jingeh ba ki shem ha kaba ïadei bad ki bank bad ba kane ka jingïakynduh kan long kum ka rynsan ïa phylliew jingmut hapdeng ki nongtrei jong ki banks bad ki nongseng kam lajong bad ki lad ki lynti ba ka RBI kan shim.
Ha kajuh ka por u la pynshai ba kane ka jingïakynduh ka long kum kawei ka lynti ha kaba ki dkhot jong ka RBI kin ïoh ban ïa mir bad ïa phylliew jingmut bad ha kajuh ka por ban ïoh jingmut bad ban sngewthuh ïa ka jingkhmih lynti jong ki na ka bynta ban nang kham pynbha bad ban pynrung ne kynthup ïa ki na ka bynta ban ai ram lyngba ki bank. Ki nongtrei jong ki banks bapher bapher ki la ai jingkren ban pynsngewthuh ïa ki nongïashim bynta halor kane ka bynta. Ha kane ka sngi la ïoh ruh ïa ka presentation halor ka MSME na ki nongtrei jong ka RBI, Shillong ki da batai bniah halor ki jingmyntoi bad ki lad jingïada ha kaba ïadei bad ka jingsei ne jingthep pisa da kaba batai bniah halor ki rukom thok rukom shukor ha kaba ïadei bad ka jingpynrung ne jingsei pisa lyngba ka bad kumno ban kiar na kiba kum kine ki jingjia.
La sam ruh 26 tylli ki loan sanction sha ki nongseng kam lajong.