Kaei ka jingkitkhlieh jong ki nongïalam Balang na ka bynta ki paitbah shuwa ka election

Satang kumba katto katne por ki paitbah ka jylla kin ïa mih na ki rympei ïing jong ki ban ïeng ha u laiñ na ka bynta ban ñion da u shympriah kti ha u budam ban kdew ba kiba kum kino ki nongmihkhmat kiba ki sngew donkam ban jied. Napdeng ki paitbah nongthep vote ha ka jylla, kumba 70% ki dei ki dkhot jong ki kynhun balang Khristan bapher bapher kiba don la ki jong ki jong ki Nongsharai, kiba ju pynïaid ha ki sngi ba ki pynlong ïa ki jingmane Blei la ka long ha ki janmiet sngi pohïa ne ha ki sngi u Blei bad 100% na ki nongïalam balang ki ju hikai ïa ki kynhun jong ki ban kiar na ki kam sniew ba bun jait bad ba kin im ka jingim kaba khuid bad kaba beit.
Haba phai pat ha ka jinglong jong ka imlang sahlang, ka synshar khaddar ngim lah ban len ba ha kane ka kynti ka jingïakawang ktieh, ka jingïakynthoh jong ki nongïalam jong ki seng saiñ pyrthei uwei ïa uwei pat, ka la long kaba la sngew jli bad lada dei ki riewp yrkhat kim kwah shuh wat tang ban ïohsngew ruh. Nalor kata napdeng ki nongïalam jong ki seng saiñ pyrthei ym dei tang ba ki ïakynthoh uwei hadien uwei pat, hynrei don ruh kiba la pyndonkam bakla wat ïa ka kyrteng jong u Blei bad ka jingkyntang jong kata ka jaka bneng.
Kaba sngewsih ka long ba ki don shibun ki nongïalam jong ki kynhun balang bapher bapher, kiba klet ba ka kam Saiñpyrthei ka dei kaba la saiñ dur bad kaba la pynkup bor da u Blei naduh myndang long ka pyrthei bad lada ki nongsynshar ki dei ka ba sniew bad ki pyndonkam bakla ïa ka jinglong nongynshar ka jong ki ki hima ki jot, ka jaitbynriew ka kyllon.
Haba pynkynmaw halor kane ka bynta, ym lah ban len ba lada ki nongïalam balang kim don ka jingkitkhlieh ban pynsngewthuh ïa ki paitbah kumno ban jied ïa ki nongsynshar, ym don jingartatien ei ei ba ka jaitbynriew ha kane ka jylla jong ngi kan kham palat ban ïa ka Sodom bad Gomorah. Kaba eh pat ban pyrkhat ka long namar ba ha kine ki sngi naduh ki paitbah haduh ki nongsynshar bad ki nongïalam balang, ki la kylla matlah haba ïohi, kyllut haba ïoh sngew bad ïa kaba sniew la ong kaba bha ïa kaba bha pat la ong kaba sniew.
Ym lah ban len ruh ba wat ki nongïalam balang kim sngewthuh shuh kaei kaba dei bad kaei kaba lait, namar tang ban pynjop ïa uno uno u kyrtong u ba ki kyrshan kim salia wat ban leit thong da ka pisa ïa ki paitbah, khamtam ïa ki longïing jong ki riew kynthei bad kiba duk tasam. Hato ki nongïalam balang ki sngew dei ne em ban pynngop ïa kiba lui lui?
Ha kaba kum kane ka por ki nongïalam balang ki dang kynmaw ne em ba ki la ïeng pyrshah shuwa ban pynlong aiñ ïa ka kam ïakhalai ï. Hato ki nongïalam balang ki pyrkhat kumno shaphang ka jingpyntreikam ban pyn poi kyiad ha ki thliew ïing kaba ki ong ka (home delivery) ba ka sorkar ka la ai jingbit ïa kiba dei ban ai?