Nongstoiñ, K’lyngkot 28: Ka long kaei kaei ka bym lah ban ngeit, hynrei ka long pat ka jingshisha ba ka sorkar pdeng ka la ithuh kyrpang ïa ka shnong Langdongdai kaba don ha West Khasi Hills bad kaba hap hapoh ka Mawshynrut C&RD Block, kum ka Aspirational village kam don jingmut satia lada ym don ka surok kaba biang.
U bah B. Ñianglang sordar jong ka hima Nonglang Sirdarship, haba pyntip ha u nongthoh khubor u la ïathuh ba hadien ba ka sorkar pdeng ka la ithuh kyrpang ïa katei ka shnong kum ka Aspirational village, ki tnad trei kam bapher bapher jong ka sorkar ki ju wan na ka por sha ka por ban ai jinghikai ba bun jait ïa ki paitbah nongshong shnong kum ha ka rep ka riang, thaiñ jingthaiñ bad kiwei kiwei ki bynta na ka bynta ban kyntiew ïa ka ïoh ka kot jong ki nongshong shnong.
Nalor kata u la ïathuh ruh ba wat ki heh ki haiñ jong ka ICAR Umïam ba kynthup ïa u Dr V.L.Verma Director, ka Dr M.Bilashini Devi kaba dei ka saïantis, Dr.Vanlalruati bad Dr H.D.Talang, ki la wan ban pynlong ïa ka jingai jinghikai kumno ban rep ban riang ïa ki jait jingthung bapher bapher kum ki syntiew ki skud bad kiwei kiwei ki jingthung.
U bah Ñianglang u la ong pat ba wat la ki heh sorkar na ki laiñ bapher bapher ki la wan ïuhkjat ha katei ka shnong ruh, hynrei kaba lyngngoh ka long ba ha kaba ïadei bad ka surok kim lah ban ïarap ei ei. U la ong ruh ba ka jingsam jong ka tnad ICAR ïa ki symbai ba bun jait kum ki symbai jhur, ki symbai syntiew bad kiwei kiwei kam don jingmyntoi ei ei lada rep bad pynroi ïa ki wat lada ka ïew ka hat ka biang, hynrei lada ka surok kaba biang kam don haduh ha shnong tang ka bai kit ruh kam mih satia.
U la ong ruh ba ha katei ka shnong ki la don kumba shispah hynñiew tylli ki longïing bad ki paitbah nongshong shnong mynta ki ap khmih lynti bad angnud ba ka sorkar kan pynkloi ban pynïoh sa ïa kiwei pat ki jingdonkam na ka bynta ki paitbah kum ka jaka sumar, ka umbam umdih bad kiwei kiwei.
Hynrei ka jingdonkam kaba hakhmat eh ka dei ka surok namar lada ym don ka surok kaba biang wat lada ki jingmih na ka thaiñ ki bun katno katno ruh, kam don jingmut namar ki shu sahkut tang hapoh shnong hynrei ban shalan sha ki ïew ki hap ym lah namar ka jingbym don ka surok.
