Shongkun ka jingrakhe ïa ka Republic Day ba 74 ha West Khasi Hills bad ha South West Khasi Hills District

Nongstoiñ, K’lyngot 28: Ha ryngkat ka ri hi baroh kawei, ïa ka 70th Republic Day la rakhe ha West Khasi Hills ha ka 26 tarik, ha kaba ki paidbah ba bun byllien ki la tuid sha ka jingrakhe kaba la pynlong da ka District Administration ha madan St Peter Pyndengrei, ha kaba u Bah Garod L.S.N. Dykes Deputy Commissioner West Khasi Hills District u la kyntiew ïa ka lama lai rong jong ka ri bad shim ruh ïa ka salute ïa ka parade jong ki 13 ki kynhun Parade ba kynthup ïa ka kynhun jong ki pulit, NCC bad 9 tylli ki sku kiba don hapoh sor Nongstoiñ.
Ha kane ka sngi la pyni khaiñ ruh ïa ki 9 tylli ki Tableau jong ki tnad bapher bapher bad la pynlong ruh ïa ki jingïalehkai pynbyrngia lem bad ka jingsam ïa ki jingbam sha ki nongpang kiba don ha Civil hospital Nongstoiñ.
Kumjuh ruh napdeng ki nongshimbynta ha ka parade, ki khynnah kynthei ka JNV Nongstoiñ ki la khur ïa ka khusnam ba nyngkong, bud pat sa ka Nongstoiñ College ha ka kyrdan ba ar bad ka Sibsingh Memorial Govt. Higher Secondary School ha ka kyrdan ba lai.
Katba ka ophis jong ka DMHO Nongstoiñ ka la khur ïa ka khusnam ba nyngkong ha ka jingpyni Tableau, bud pat sa ka tnad Agriculture lem bad ka Horti & Mechanical Engineer kiba la khur ïa ka khusnam ba ar. Katba ïa ka khusnam ba lai la ïoh da ka Meghalaya Basin Development Authority. La sam ruh ïa ka khusnam best block Asha ha kane ka sngi.
Mawshynrut: Ha Mawshynrut Civil Sub Division, la pynlong ha madan Riangdo, ha kaba u Bah H.K Thabah u la kyntiew ïa ka lama lai rong bad shim ruh ïa ka salute sha ki lai tylli ki kynhun parade ba kynthup ïa ki pulit bad ki khynnah skul.
Ha kane ka sngi la pynlong ruh ïa ka jingïalehkai phutbol paralok hapdeng ki nongtrei sorkar bad ki rangbah shnong. La sam ruh ïa ki jingbam sha kiba duna dkhot met da u kongsan bad la pynlong ruh ïa ki prokram pynbyrngia ha kane ka sngi.
Mawkyrwat: Ryngkat bad shityllup ka Ri India ha ka 26 tarik u Kyllalyngkot, 2023 la rakhe ïa ka jingdap 74 snem ka jingïoh Republic ha South West Khasi Hills District ha kaba u Deputy Commissioner jong ka South West Khasi Hills District, Mawkyrwat, u bah T. Lyngwa, IAS, u la pynher ïa ka lama ka Ri bad shim ïa ka Rashtriya Salute jong ka kynhun parade kaba kynthup naduh ki pulit, ki NCC haduh ki khynnah skul ha ka jingrakhe ïa ka jingdap 74 snem jong ka Republic Day kaba la pynlong ha phyllaw Ïingskul jong ka Nativity Higher Secondary School, Mawkyrwat ha ka rukom kaba ishongkun.
La wan ban ïa sakhi ïa kane ka jingrakhe da ki nongtrei sorkar, ki khynnah skul ryngkat ki nongshong shnong jong ka distrik.
Lah ruh ban kdew ba kumba 6 tylli ki skul ki la ïashimbynta ha ka March Past bad kumba 8 tylli ki departments ki la ïashimbynta ha ka jingïakop pyni ïa ki Tableau.
La pynshongshit shuh shuh ïa kane ka sngi da ka Cultural Programme, ka jingsam jingbam da ka Officers’ Club, Mawkyrwat sha ki khunswet jong ka Hope Orphanage ha Mawlangwir bad Marshillong ba la pynbud da ka jingïalehkai Sports na ka bynta ki Specially Abled.
Haba phai ha ka March Past, ka Jawahar Navodaya Vidyalaya, South West Khasi Hills District ka la rah ïa ka khusnam nongjop bad ba la pynbud da ka Maharam Higher Secondary School, Mawkyrwat ha ka kyrdan kaba ar bad ka Little Star Higher Secondary School, Mawkyrwat ha ka kyrdan kaba lai.
Ha ka Cultural Programme, ka Jakrem Presbyterian Higher Secondary School ka la wan ha ka kyrdan kaba nyngkong bad pynbud da ka Balang Mawlangwir Higher Secondary School ha ka kyrdan kaba ar bad ka Jawahar Navodaya Vidyalaya, South West Khasi Hills District ha ka kyrdan kaba lai.
Ha ka Tableau Presentation, ka Meghalaya Basin Management Agency ka la ïoh ïa ka kyrdan ba nyngkong, bud sa ka District Commerce & Industries Centre, Mawkyrwat ha kaba ar bad ka National Rural Livelihood Mission ha ka kyrdan kaba lai.
RANIKOR: Ryngkat bad shityllup ka Ri, la rakhe mynta ka sngi ïa ka jingdap 74 snem ka jingïoh Republic ha Ranikor Civil Sub Division ha ka rukom kaba ishongkun ha kaba u B.J. Kharchandy, Sub Divisional Officer (C) Ranikor Civil Sub Division u la pynher ïa ka Lama bad shim ïa ka salute jong ki Parade Contingents kiba kynthup naduh ki Police haduh ki skul kiba don ha kane ka dong ka thaiñ ha ka jingïalang kaba la long ha madan Nolikata, Ranikor Civil Sub Division.
Ha kane ka sngi la pynlong ruh ïa ki Cultural Programme, ki jingïalehkai ïa ki khynnah bad kiwei de ryngkat ka jingsam ïa ki khusnam sha ki nongjop.
Ha ka March Past, ka Nolikata High School, Ranikor Civil Sub Division ka ïoh ha ka kyrdan ba nyngkong bad bud sa ka Nibon Lower Primary School, Ranikor ha kaba ar bad ka Nolikata Upper Primary School, Ranikor ha ka kyrdan kaba lai.
Nangta, ha ka Cultural programme, ka Self Help Group Photkroh ha ka kyrdan ba nyngkong, ka Tylli Ngin Ïeng Self Help Group, Nongkdait-Nongtwah ha ka kyrdan kaba ar.