La pynlong ïa ka jingïalang ha kaba ïadei bad ka Legislative Assembly Election ha Mawkyrwat

Mawkyrwat, K’lyngkot 19: Hadien ba la pynbna ïa ka tarik jong ka General Meghalaya Assembly Election 2023 ha Meghalaya bad ba la pyntreikam ïa ka Model Code of Conduct, na ka liang ka ophis jong u District Election Officer, South West Khasi Hills District mynta ka sngi ka la thaw ïa ka Standing Committee ha kaba ïadei bad ka Model Code of Conduct ha ka jingïadonlang ki dkhot jong ki Political Parties bapher bapher ha kaba ïa kane ka jingïalang la pynlong ha Multipurpose Hall, Deputy Commissioner’s ophis, Mawkyrwat.
U bah T Lyngwa uba long ruh u District Election Officer ka South West Khasi Hills District ha ka jingkren lamphrang ha kaba ïadei bad kane ka jingïalang u la ïathuh ba hadien ba la pynbna ïa ka tarik ban pynlong ïa ka elekshon bad ba la pyntreikam ïa ka Model Code of Conduct la phah ïa ki kynhun ban weng noh ïa ki poster bad lama kiba wah harud surok da kaba batai ruh ba lada kwah ban wah lama ha ki ïing briew dei ban ïoh ka jingbit na ki trai bad ym shah ban wah lama ha kano kano ka jaka ba dei jong ka sorkar bad lada ki kwah ban wah lama ne stickers ha ki kali kin hap ban applai lyngba ki Returning Officer jong ki 2 tylli ki konstitwensi.
Ha kajuh ka por u la ïathuh ba la buh ïa ka Video Surveillance Team ka ban peit ïa ka kheiñ ka diah halor ka jingpynlut pynsep jong ki kyrtong bad ba ka jingpynlut baroh jong ki ha kane ka elekshon kam dei ban palat ïa ka 28 lak bad kin don ki Expenditure Observers ki ban khmih halor kane ka bynta. U la ïathuh ruh ba ha shwa ba kin print ïa ki poster, pamphlets, manifesto, pynmih cassette bad kiwei kiwei da uno uno u kyrtong kin hap ban ïoh shwa ka jingmynjur na u District Election Officer bad ka syrond na ka Media Certification & Monitoring Committee ba la thung ha ka distrik bad dei ban don ka kyrteng jong ka Printing Press, lym kumta yn ym shah ban pyndonkam.
Shuh shuh la batai ba ym dei ban pynlong ïa kino kino ki meeting ne jingïalang ha ki jaka sorkar ne ki skul sorkar bad haba ki don jingthmu ban pynlong meeting ki dei ban ai jingtip shisngi (24 kynta) shuwa ryngkat bad ki scheduled ne programme khnang ba kan ym mih kano kano ka jingpynthut. Ha kaba ïadei bad kito kiba la kynjoh 80 snem palat ha ka rta, kiba don jingduna ha ki dkhot met bad kiba ïoh pang Covid, ka Election Commission ka la pynbeit da ki Postal Ballots khnang ban pynshlur ïa ka jingwan ïashimbynta jong kiba bun ki nongthep vote.
Nangta, u la ong ba ki jingkyrpad ne ki appeals kim dei ban pynthohbria ne ktah mat ïong ïano ïano ruh bad lada don kino ki jingbymbiang yn khot ïa ki na ka bynta ban pynbeit bad pynbit pynbiang bad lada don kino kino kina ki jingpynshai ki dei ban pyntip ïa ki Returning Officer lane ki lah ban phone sha u District Election Officer, khnang ba kane ka elekshon kan long kaba ïaid beit ïaid ryntih.
Ha kajuh ka por u la pynkynmaw ba la buh da ki CCTV bad web casting ha ki Polling Station bym don Internet Connection bad kito kiba rah pisa palat ïa ka 50 hajar yn knieh bad kito ki briew kiba shah knieh ki hap ban don ka jingpynshisha halor ka jingdonkam jong kata ka pisa. La pynshai ruh halor ka dor ba la buh na ka bynta baroh ki tiar kynthup ïa ki kali ba kin pyndonkam ha ka por elekshon.
U bah I. Lawryniang, MCS, EAC, BDO uba long ruh kum u ARO jong ka 36-Mawkyrwat Assembly Constituency u la ai jingbatai halor ka jingpyntreikam ïa ka Model Code of Conduct.