Ki party ha ka sorkar MDA ki long kum ki khla bam doh hati: Vincent Pala

Nongstoiñ, K’lyngkot 18: U Bah Vincent Pala MP ka Shillong u ba long ruh u President rangbah jong ka Jylla lane Meghalaya Pradesh Congress Committee, u la ong ba baroh ki party hapoh ka sorkar MDA ki long kum kito ki khla kiba bam doh hati. U la ong ba haba ka doh ka dang bun kim don jingkhih hynrei hadien katto katne ba ka doh kam don shuh sah satang ki shyieng, ki sdang ban wad dong wad daw uwei ïa uwei pat.
Kane ka la jia dang shen hapoh kane ka sorkar ba la ïalam da ka NPP, ha kaba ka UDP, BJP, PDF bad kiwei kiwei ki la sdang kynnoh bun jait ïa ka NPP. “Phi iohi naduh ba sdang ïa ka jingïatreilang hapdeng ka BJP, NPP, PDF, UDP, HSPDP. Katba dang ieh ha ka bor jong ka Congress, ka spah kaba bun, ka kam ka jam kaba bun, kine ki ïa ieit bha ki ïa snohkti ki da leit ap leit lang shaduh Guwahati bad kim ju ïa kynnoh iwei ïa iwei. Hynrei, haba la lut ka spah, kine dang shen ki la sdang ïa kynad para ma ki ban ïaknieh ïa ka shyieng”.
“Dei na kane ka daw nga kren ba ka Congress ha kane ka wat ba mynta kan jop bad kan da jop kput ïa ka jingmutdur jong ngi. Balei..? ka daw ka dei namar ba ki paidbah ki la phai ba ki la ïohi ba kine kiba don ha ka sorkar mynta, kim don jingmut ei ei ruh ban trei na ka bynta ki paidbah. Hynrei, tang ban ïaknieh ïa ka doh ne ka shyieng para ma ki namar ïa ka spah jong ka Jylla la pynïaid tang kawei ka party kaba ka NPP”, u la ong.
Na ka liang u Ma Pala u la kyntu sha baroh ki dkhot bad nongkitkam jong ka party ban trei shitrhem khlem phai shane shatai. Hynrei ban buh beit hakhmat ba ka party kan jop ha man ki jaka bad ki Constituency ka District, khnang ban wanrah pat ïa ka jingsynshar kaba khuid ka bym don shillïang ïano ïano ruh lada dei ïa kiba don ba em ne kiba duk bas hem jynjar.
U Bah Bormanding Nonglang President jong ka District Congress Committee haba ai jingkren u la ong, “Ki paidbah ka West Khasi Hills bad jong ka Jylla hi, ki la ngiah hi shoiñ ïa kane ka sorkar MDA ba la ïalam da ka seng NPP. Ha Rambrai jong ngi mynta tang shu ong seng NPP ki ong oh..ka party sniang. Ki wan pynbiej ïa ki nong Rambrai bapli da ki sniang kat haduh ba wat ki sniang local ba ri la jong ruh ki ïap lang bad ki sniang ba ai ka NPP”.
“Ha Rambrai ngi don ka thong ban jop beit ïa ka elekshon pyrshah ïa u kyrtong ka NPP. Hynrei, kaei kaba donkam ïa ngi kum ki nongkitkam bad ki nongtrei ka party ka long ban ïatreilang da ka jingieit, jingsngewrit khnang ba ki jingangnud jong ki ngi ïa ka jingsynshar kaba lah ban ai jinghun sha baroh salonsar kan urlong”, ong u Bah Bor.
Kiwei kiwei kiba la ai jingkren ha kane ka sngi, ki kynthup ïa kito ki riew rangbah bad longkmie kiba dang shu pynïasoh sha ka party na kiwei pat ki party. Nangta kiba la don ryngkat ki kynthup ruh ïa u rangbah Fourteenson Lyngkhoi kyrtong na Mawthadraishan bad u A.C Gare kyrtong na Mawshynrut Constituency.