Ka la dei sa ka pali jong ka Congress ha Nongstoiñ: Gabriel Wahlang

‘U MLA ka NPP um don jingkheiñ snep ïa kiwei’

0

Nongstoiñ, K’lyngkot 19: U Bah Gabriel Wahlang MDC u ba long ruh u kyrtong sha ka MLA elekshon 2023, u la ong ba mynta ka kynti ka la dei sa ka pali jong ka Congress ban jop ha Nongstoiñ Constituency.
Haba ai jingkren ha ka jingïalang jong ki nongkitkam ka party Congress ha Bishop Hall Nongstoiñ, u Bah Gabriel Wahlang u la ong, “To ngeit ba ngin jop ha une u 2023, kata ryngkat ka jingdwai ha u Blei bad ryngkat ka jingtrei shitom. San snem ngi la dep jaw ki ummat, pynban mynta u snem kin long ki mawlynnai na ka bynta ka lawei ka jong ngi”.
U la ong ruh, “Ha kine ki sngi kin sa bun ki ban sa wan ban pynbiej ïa phi, hynrei ieng skhem bad shaniah. Ha kine ki sngi la mih ki jingkynnoh ba nga la shah thied da ki klur ha ka NPP kiba long tang ki jingpynthame, namar ki la tieng ba ka Congress kat nang mih ki sngi ki la nang trei shitrhem bad pynkhlaiñ bad ka party ruh ka la nang khlaiñ ban poi sha ka thong jong ka jingjop”.
Ha ka jingïalang hakhmat jong ki hajar ngut ki nongkitkam bad nongkyrshan, u Bah Gabriel u la pynshai paitbah ruh halor ka video ba la pynsaphriang paitbah bad par stet ha ki social media, ha kaba u la ai jingkren khublei jong ïa u Bah Macmillan Byrsat MLA, Nongstoiñ ha ka sngi plie ïa ka Girl’s Hostel ha ka shnong Pyndengrei ha ka 30 tarik Nohprah 2022.
U la ong, “Ha kaba ngi ïa don lang ha katei ka programme ba la ring da ki nongkyrshan NPP, nga la kren ai khublei ïa u MLA, u ba la ai kam pynroi hapoh shnong bad shibun ha Nongstoiñ bad ngam kot bor kum u MDC barit kat ka bor u MLA”.
“Nga kren khublei ïaroh pharshi khnang kumtei, namar ba katba don ki jingïalang u MLA u la kam bad u ong kham lah ma u 5 snem ban ïa nujor bad kiwei ki MLA 45 snem. Kane ka jingkren jong u ka long ba u don jingkheiñ snep lane khlem da burom bad ai khublei ïa kiwei ki MLA kum Maieid (L) Hopingstone Lyngdoh MLA, Bah Francis Mawlot MLA bad kiwei ki MLA ba la wanrah jingmyntoi ïa ka Nongstoiñ”.
“Ïa kane ka jingkren jong nga la pynkiew skong ïa ka NPP bad la shim kabu politik ruh da ka UDP bad kiwei ki Political Party. Hana ki ong ba ka Congress ka don ka jingïadei bad ka NPP. Nga pynshai ïa phi ki paidbah bad ïa ki nongkyrshan baieit jong nga, ba baroh ki jingkynthoh ki long tang ki jingmutdur sniew jong no re jong no, ba khlem nongrim”.
“Nga ieng beit ha ka nongrim jong ka Congress, ban wan rah biang ïa ka jingsynshar laitluid bad ban ïaleh pyrshah ïa ka jingshah thombor ïa ka hok ki paidbah ha baroh ki liang. Sngewbha wat ngeit biej ïa ka jingpynthame bad ka issue politik jong kiwei”, u la ong.

Leave A Reply

Your email address will not be published.