Ka dei ka sorkar tuh, lada kan wan biang ha ka bor kan sa die duh ïa ka Jylla : Bah J.A Lyngdoh

Nongstoiñ, K’lyngkot 19: U Bah J.A Lyngdoh kyrtong Congress na ka North Shillong, haba ai jingkren ha ka jingïalang jong ki nongkitkam ka party Congress ha Nongstoiñ, u la ong ba lada kane ka sorkar MDA ba la ïalam da ka NPP kan wan biang ha ka bor sa shisien, ka don ka jingma ba ka lah ban die duh ïa ka jylla bad ka Jaidbynriew baroh kawei.
U la ong ba lada phai dien sha kine ki san snem ba la leit noh, ka Jylla hi ka la mad ïa ka kordit sat namar ka rukom synshar don bor ka bym pat ju jia mynno mynno ruh ha ka History jong ka Jylla Meghalaya. U la kyntu ïa ki paidbah ba ki dei ban kyndit bynriew ha kane ka kynti ba mynta, lym kumta ka jaidbynriew kan jot syndon, ha kaba wat ki bar jylla ruh ki la kren ïa kata lada yn wan biang kane ka sorkar.
U la ong ba watla long sa kumno kumno ruh dei tang ka Congress hi ka ba lah ban wanrah ïa ka jingkyrmen jong ka lawei ka ban sa wan. “Pynjop ïa u candidate jong ngi na Nongstoiñ nangne, pynjop ruh na Mawthadraishan, Mawshynrut bad na kiwei kiwei ruh ki Constituency kiba hap hapoh kane ka District jong phi”, u la ong haba ïalap ïa wer bad ai mynsiem sha ki nongkitkam jong ka Congress Party.
Haba pynshai paidbah ïa ka sorkar MDA u la ong, “Phi tip ne em kaei kane ka MDA ?. Ka sorkar MDA jong ngi to kynmaw ka hap hapoh ka jingpynïaid jong kata ka NEDA lane North East Development Alliance. Baroh ki seng riew lum ki hap hapoh ka jingpynïaid jong ka NEDA, namar ki dei ki shnat kiba hap hapoh ka jingpynïaid jong ka. U Chairman jong ka u dei u myntri rangbah jong ka Jylla Assam u Himanta Biswa Sarma u ba dei ruh na ka seng BJP. Kamut baroh ki shah synshar ha u myntri rangbah ka Assam lane BJP”.
“Dei na kata ka daw baroh kine kiba don ha ka MDA kim lah ban ong ba kim ïalong paralok bad ka BJP. Ka UDP, NPP bad baroh kito ki seng riew lum kim lah ban ong ba kim don jingïadei bad ka BJP. Kumta ka la dei ka por ba ngi dei ban ai jingsneng mynta ka kynti ban ong ba ngim donkam shuh bad ngim treh ïano ïano ruh kine ki seng khun BJP. Hynrei, phai beit dairek sha ka Congress, namar ka Congress ka dei ka seng jong u paidbah, na ka bynta u paidbah bad ïa u paidbah”, u la ong.
Haba ther jur ïa ki kam lum spah beaiñ bad ki kam leh donbor jong ka NPP, u la ong “Kiba bun mynta ki MLA ki shah thied lut da kata ka san klur kumba ong u MLA jong ka Mawkynrew, u ba dei ruh uwei na ki minister jong kane ka sorkar MDA. Ngi la dep ïohi lut lyngba ki kot khubor ba u la ong ba la u la shah tyrwa san klur tangba um treh. Hynrei, kiwei pat ki MLA kiba na kiwei ki party ki rung sha ka NPP, kaba mut ba ki la shah thied bad ka jingkren jong u bah Banteidor ka khlem bakla satia”.
“Kum ki nongkyrshan jong ka Congress bad jong u Bah Gabriel ha Nongstoiñ phim dei ban shah thied da lei lei. Namar ka jingïaleh mynta ka long Congress pyrshah ïa ka sorkar MDA, kaba mut pyrshah ïa ka NPP, UDP, BJP bad PDF. Ka thong jong ka Congress mynta ka long ba ngi dei beit ban jop ïa kine ki saw party”.
“Phi lah ban mutdur ba haba ka elekshon ka la ha jingkhang, ba kine ki seng ki sdang ba pynbna ïa ki skhim lai phew jait. Nangta kane ka sorkar MDA kaba kine ki saw party ki don, kam shym don kano kano ka jingmyntoi kaba wanrah ïa ka ïoh ka kot kaba wanrah ïa ka pla tyngka jong ka sorkar lane ïa ki paidbah. Lada don balei ka pynshah thngan pynshong miet ïa ki nonghikai hajan Secretariat”.
“Haba ki pan ym don ei ei ban ai namar ym don pisa ban ai. Katba u dewiong ba shu kit beaiñ na ka Jylla shabar ka jylla da ki 30 haduh 35 metric ton, hato shano ka pisa ba ka fine na ki trok kit palat pud, haba kam don ha ka pla pisa jong ka sorkar. Sngewsih ban ong ba pisa baroh ka rung beit tang sha ka party fund jong ki”.
“Kane ka sorkar hi kan ym lah da lei lei ban ai ka jingsynshar kaba hun. Lada ïa kren ïa ka suk ka saiñ ngim ïohi ïa ka kata ka jingshongsuk ha la ka jylla, kata la ka long ha Shillong ne ha ki jaka khappud, ym don jingshngaiñ satia. Lada kan wan biang sa shisien ha ka bor, ka jingma ka ap ba sa kan die duh syndon ïa ka jylla hi baroh kawei”, u la ong.