Jowai, Lber 19: Ka Jaiñtia Hills Development Society (JHDS) ryngkat bad ka jingïatreilang bad ka ophis District Social Welfare Officer West Jaiñtia Hills District ki la pynlong ïa ka jingai jinghikai ba shibnai 30 sngi, halor ka kam suhjaiñ ïa kaba la sdang naduh ka 3 tarik u Rymphang bad la pynkut noh mynta ka sngi ka 19 tarik u Lber 2025.
La pynkut ïa kane ka jingai jinghikai da kaba la sam ïa ki syrnot (Certificate) sha ki 20 ngut kiba la ïoh jinghikai ïa kaba la sam da ka District Social Welfare Officer West Jaiñtia Hills ka kong Y. Najiar.
Ïa kane ka program ai jinghikai la pynlong hapoh ka Training Centre jong ka JHDS kaba don ha Lumbihsyntu Mihmyntdu West Jaiñtia Hills District.
Hashwa ban sdang ïa kane ka program la don ka jingïalang ba lyngkot ïa kaba la pynïaid da u Program Coordinator ka JHDS u ma Denis Kurkalang ha ka jingïadonlang u Director ka JHDS u Fr. Manbha Pakem, u ma Francis Langlein Field Program Associate ka JHDS bad kiwei de ki staff ka JHDS.
Haba ai jingkren, u Fr Manbha Pakem u la ai khublei ïa ka ophis treikam Jong ka District Social Welfare office kaba la ïarap ban bei tyngka ïa kane ka program. U la kyntu bad ai mynsiem ruh ïa ki nongshah hikai ba kidei ban pyndonkam hok ïa ka jinghikai ba kin sa ïoh khnang ba kin lah ban kyrshan ïa ka ka ïing ka sem jong ki namar kane ka kam ka long ka lad kamai jakpoh khamtam ha kum kane ka juk kyrduh kam.
Ka District Social Welfare Officer ka kong Y. Najiar ka la ong ba ka thong jong ka sorkar ka long ban plie lad ïa ki longkmie bad ki samla bym don kam don jam lyngba ki jingïarap bapher bapher kiba ka sorkar ka la theh. Ka la pynshlur ruh ïa ki nongshah hikai ba ki dei ban burom ïa la ka kam ba ki trei khnang ban wanrah ki jingkylla ha ka ïoh ka kot jong ki.
Ha kane ka program ai jinghikai la ïashimbynta da ki 20 ngut ki kynthei kiba kynthup lang ïa ki samla bad ki longkmie bad la ai jinghikai da i kong Iaki Ryngkhlem iba long iwei na ki nonghikai ba la paw ka thaiñ.
