Jowai, Nohprah 13 : Ka District Hub for Empowerment of Women (DHEW) kaba hapoh ka tnat Social Welfare, West Jaiñtia Hills District ha ryngkat ka jingïatreilang bad ka Happy Red Rooster MMA, kila lah ban pyndep ïa ka jingai jinghikai kaba san sngi lynter ïa ki khynnah kynthei jong ka Kiang Nangbah Higher Secondary School, Mynthong bad ka Dulong SSA Jowai Secondary School ba kin long kiba la pynkhreh ban ïada ïalade.
Ïa kane ka jingai jinghikai la pynlong ha Dulong Community Hall, ha kaba ki la ia don baroh 42 ngut ki khynnah kynthei kiba la wan ban ïashim bynta ha kane ka jingshah hikai bad ki la ioh jingpynshai bad ioh ruh ia ki jingtip ha ka rukom ban ïada ïalade, la ai jingpyshai bad jinghikai da ki nonghikai (master) kiba la pyntbit na ka Happy Red Rooster MMA.
Kane ka long shi bynta na ka prokram ai jinghikai kaba 16 sngi ban pynkut shi syndon ïa ka jingshah thombor jong ki kynthei hapoh ka lama Beti Bachao Beti Padhao (BBBP) da ka jingthmu ban wanrah ïaka jingshngaiñ ban ïaleh pyrshah.
Na ka liang u kongsan bah G. H Passah, MCS, u la pynpaw ba ki jingeh ba ki khynnah kynthei ki ïakynduh haka imlang sahlang na ka jingshah thombor, U la kdew ba ka jingshah lehbeiñ ki kynthei lah ban ïakhun pyrshah da kaba pynlong kum kine ki jingai jinghikai ban ïada ïalade kaba long ka atiar kaba lah ban wanrah ka jingshngain ïa ki khynnah kynthei.
U Bah U H. Saioo, Sub- Inspektor jong ka Jowai Trafic Branch, WJHs u la ai jingmut na ka bynta ki jingshngañ ki ki kynthei na ka jingshah ngop ha ki online ba bun rukom, da kaba ai jingmut ruh ban ïada ïalade ban nym ai jingtip klumar sha kiwei.
U Bah Isaiah Kharmawphlang, uba na ka Happy Red Rooster, MMA ula pynpaw ba ka jingai jinghikai kaba la pynlong ha kane ka taiew ba la dep ka long ka jingtip ba kongsan halor ka jingïada ïalade na ka bynta ki kynthei, u la ban jur da kaba ong ba ban ïoh ïa ka jinghikai kaba man ka por ka long da kaba ïasam ne pynphriang lem ïa ki jingtip sha ki paralok jong ki.
Ha kane ka sngi la ïoh ka jingkren pdiang na ka kong Y. Najiar, District Social Welfare Officer kaba la kren shaphang ki kyndon ba la pynkup bor ia ka kynthei bad ka jingdonkam ki awareness prokram bad ki skill based programme.
Ïa kane ka prokram la pynïaid da u bad M.Bareh uba long u waheh shong jong ka shnong Dulong bad la ioh ruh ia ka jingkren ai khublei na u bah FGN Rynga uba dei u District Mission Coordinator jong ka DHEW Social Welfare, Jowai.
