La pynhap pyrda noh ïa ka taïew lehkmen ki samla pule jong ka Khadsawphra College, Mairang

Mairang, Naiwieng 10: Kum shibynta ban lum ban lang ïa ki samla pule da ka jingthmu ruh ban pynïar ïa ka jingmut jong ka jingïatylli lang bad jingïalang kawei hapdeng ki samla pule, ki nongpynïaid ka Khadsawphra College, Mairang ki la pynlong ïa ka taïew ka jingïalehkmen jong ki samla pule ka ‘College Week 2023’.
Ïa kane ka taïew leh kmen, la ïoh ban sdang naduh ka 1 tarik u ‘Naiwieng, 2023 bad la pynkut noh ïa ka ha ka 9 tarik u ‘Naiwieng 2023 ha ka jingïalang kaba la pynlong hapoh ka Auditorium Hall jong ka College ha Mairang Mission.
Ha ka sngi pynkut ïa kane ka taïew lehkmen ki samla pule jong ka Khadsawphra College, Mairang la wan ban ïadonlang lang u Deputy Commissioner ka Eastern West khasi Hills District, u bah Gideon Kharmawphlang, IAS uba la long kum u kongsan ha ka jingïalang ha ka por mynstep lem bad ka jingïasynran lang ka BDO jong ka Mairang C&RD Block, ka kong L.R. Hynñiewta.
Katba ha ka bynta jong ka noh phai sngi la sakhi ïa ka jingiadon lang u Deputy CEM ka KHADC, u bah P.N. Syiem kum u kongsan ha ryngkat ka jingïasynran lang u Pa’iem P.M. Syiemlieh u Syiem ka Hima Nongkhlaw, ki nonghikai ki samla pule lem bad kiwei kiwei.
Ha kane ka sngi la ïoh ruh ban sam ïa ki khusnam sha ki nongjop ha ki jingïakop bapher bapher kiba kynthup ïa ka jingïakob rwai, jingïakob shad, jingïakop kyntip (quiz), ka table tennis, ka carrom, ka jingïakynjatbol bad kiwei de ki jingïalehkai ha kaba la ïoh ban sam ïa ki khusnam sha ki samla da ki kynrem ki lyndam.
Ïa ka nam jop ha kane ka College Week jong u snem 2023 la rah da ka Wah Kynshi Group bad ka Lum Kyllang Group ka la ïoh rah ïa ka nam Best Discipline.