Nongpoh, Naiwieng 10: Ka Confederation of Ri-Bhoi People (CoRP) mynta ka sngi kala pynpaw ba kum ka seng ka don lang ban ai ka jingkyrshan ïaka jingïakhih jong ki ASHA haka jylla kiba la dawa ïala ka jong ka hok ban kyntiew ïaka bainong bad kiwei kiwei ki mat jingdawa.
Naka liang u Bah Pateng Marsing Working President ka CoRP u la ong ba kum ka seng ka dap da ka jingsngewkhia kaba jur halor ka jingshah lehbeiñ ki ASHA haka jylla kiba la shah ai burom ruh halor ka jingshakri bad ki kam ba ki trei wat ha ka jingsiew kaba rit eh kaba 2 hajar shi bnai, hynrei kim kheiñ ban pyndep ïala ka jong ka kamram.
U la ong ruh kumba ki ASHA haka jylla mynta ki don hapdeng ka jingïakhih bad sangeh treikam naka liang ka seng kan don lang bad ki ban ai ka jingkyrshan wat lada dei ban mih sha surok naka bynta ban dawa bad ban pynioh ïaka hok ka jong ki.
