Jowai, Naiwieng 11: Ka tnad Animal Husbandry and Veterinary Department, Directorate of Dairy Development, West Jaiñtia Hills hynnin ka sngi kala pynlong ïa ka prokram ai jinghikai ïa ki khynnad skul halor ka jingdonkam ban dih ïa ka dud kawei na ki jingbam kaba biang eh nadong shadong kane ka prokram ka long shi bynta naka na ka jingkynmaw burom ïa ka National Milk Day kaba ju long manla ka 26 tarik u Naiwieng.
Ïa kane ka prokram la pynlong ha ka Dorbal Hall ka Shnong Chilliangraij, Jowai ha kaba la wan ban ïahim bynta da ki khynnah skul, ki nonghikai ka Chilliangraij Govt. LPS, Chilliangraij SSA UPS, LoompyrdiIongpiah UPS SSA, Pohmusiang UPS SSA bad na ka Panaliar UPS SSA.
Na ka liang ki riew shemphang kiba la wan ban ai jinghikai halor ka jingdonkam ban dih ïa ka dud ki kynthup ïa ka Mebel Shylla, Senior Dairy Officer, Animal Husbandry and Veterinary Department, Directorate of Dairy Development, West Jaiñtia Hills, u ma E. Wann, Dairy Technology, Directorate of Dairy Development, West Jaiñtia Hills, katba ïa ki kyntien ai khublei la ïoh na u Oriland Shylla, General Secretary Chnong Chilliangraij, Jowai.
Ka kong Mebel Shylla kala batai khnang ba ki khynnah kin ïoh ïa ka met kaba koit ba khiah bad ban don ïa ki Nutrient bad ki Vitamin ki donkam bha ban dih ïa ka dud, kala ai ruh ka jingkyntu ïa ki School Managing Committee ba kin ai lad ïa ki khynnah ban dih dud haka por ba ai ja sngi Mid Day Meal, kala kular ruh ba ka tnad jong ki kan ïaleh katba lah ban pynpoi ïa ka dud sha ki skul ha ka dor kaba kham tad.
Hadien jong kaneka jingïalang la don sa ka jingsam ïa ka dud sha baroh ki khynnah skul kiba la poi sha kane ka prokram ha ryngkat ki nonghikai.
