Ka jingpynmih tender ka MIDC ba 8 klur tam tang kawei kadei ba thmu pynkamai ïaki kompani heh spah: CoRP

Nongpoh, Naiwieng 10: Ka Confederation of Ri-Bhoi People (CoRP) mynta ka sngi kala mih shakhmat ban pynpaw ka jingsngew kaba jur halor ka jingpynmih ka Meghalaya Industrial Development Corporation Ltd. tang kawei ka tender kaba 8 klur tam ha MIDC Umiam kaba la ktah pat ïa kiba bun ki kontraktor ki bym donkam donjam ba kum ka seng kala pynpaw ruh ba katei ka jingpynmih tender tang kawei ka dei ka jingthmu ban pynkamai ïaki heh spah, ba ki kontraktor ba rit kin nym iohlad ban trei.
Haba kren sha ki lad pathai khubor naka liang u Bah Bandari Ryntathiang, haka jingdonlang u Bah Pateng Marsing Working President bad ki dkhot u la ong ba kum ki samla na Ri-Bhoi ki dap da ka jingsngewkhia kaba jur halor ka jingpynmih tender ka MIDC tang kawei kata ruh kaba palat ïaka 8 klur ha kaba ha katei ka tender ki don shibun ki kam ban trei ba ki local kontraktor na kane ka jaka ki lah ban trei ïaka kam kum ban ailad lang ruh ïaki ban trei namar bun naki kontraktor khamtam ki klas III ki shu lut tang ban pynthymmai ïaki kot ki sla hynrei kim iohkam satia ban trei ban ktah.
U la ong ruh ba katei ka jingpynmih tender da ka MIDC bala long Chairman ruh da u James Sangma ka long ban aikam tang ïaki heh spah, namar ka dei ka kam kaba heh ha kaba kum ka seng kala kyrpad sha ka sorkar ba kan phiah noh ïa katei ka 8 klur khnang ba ki kontraktor kiba trei ïaki kam kiba kham rit ruh ki ioh bynta lang ban trei ban ktah.
Naka liang ka seng kala byrngem ruh ba lada jia ba ïa katei ka kam yn ai sha ki bar jylla naka liang ka seng kan nym ailad satia ba ki kompani nabar kin wan ban trei ha katei ka jaka bad kum ka seng kan sap hah ruh da ka jingthoh sha u Myntri Rangbah ka jylla ban pynsangeh ïa katei ka tender bad ban pynmih da kawei.