La pynhap pyrda noh ïa ka 3×3 Khelo India U-17 Women’s League kaba lai sngi

Shillong, Nailar 30: Ka Meghalaya Basketball Association ha ryngkat ka jingïatreilang bad ka Sports Authority of India lem bad ka Basketball Federation of India ka la ïoh ban pynhap pyrda noh ïa ka lympung lehkai 3×3 Khelo India U-17 Women’s League ïa kaba la sdang naduh ka 27 tarik Nailar haduh 29 tarik, Nailar, 202 ha St.Anthony’s Higher Secondary School, Shillong.
Ki la don 9 tylli ki kynhun jong ki thei kiba la wan ban ïashimbynta ha kane ka lympung 3×3 Khelo India U-17 Women’s League kaba la pynlong ha St.Anthony’s Higher Secondary School. ïa ka namlahduh la rah da ki thei jong ka Pinemount Warriors hadien ba ki la lah ban pynliem ïa ka Sacred Heart ‘A’ ha ka jingïakhun ïa ka final. Katba ka kynhun lehkai Sacred Heart ‘B’ ka la ïoh ban wan ha ka kyrdan ba lai.
Ha kane ka sngi, u Fr. Anthony Kharkongor Principal jong ka St. Anthony’s Higher Secondary School u la long kum u Kongsan ha ka jingïadon ryngkatlang bad i Kong Yalinda Jyrwa Vice-President jong ka Meghalaya Basketball Association bad u Bah Wanlambok Iawphniaw, Joint Secretary jong ka Meghalaya Basketball Association lem bad kiwei ruh de.
Haba phai sha ka jingïalehkai ka Pinemount Warriors ka la ïoh ban thep palat da 18 basket point, katba ka Sacred Heart ‘B’ ka la ïoh ban pynrung tang 11 basket point, kaba la pynlong ïa ki thei ka Pinemount Warriors ban khur ïa ka namjop jong kane ka 3×3 Khelo India U-17 Women’s League kaba lai sngi ha St.Anthony’s H.S.S.
La ïoh ruh ban sam ïa ki Certificate sha katto katne ngut ki thei ka jylla kiba la trei shitom ban kyntiew ïa kam lehkai Sports na ka bynta ki kynthei hapoh la ka jong ka jylla. Kine ki kynthup ïa ka Larihun.A.Warjri, ka Ewadaemi.C.Challam, ka Cordiallicia Dkhar, ka Wertimon Dkhar bad ka Supriya L Swer.