Shillong, Nailar 30: Ka 10th North East Zone Shooting Championship 2023 kaba la sdang naduh ka 20 tarik Nailar, 2023 la ïoh ban pynhap pyrda noh hynnin ka Sngi U Blei ka 27 tarik ha Precision Indoor Range jong ka Assam Regimental Centre, Happy Valley, Shillong.
U P.Hanaman,IPS, u ba dei u dkhot jong ka Human Rights Cormmission, bad ruh u DGP barim ka Meghalaya kum u Kongsan katba u Col.B.S. Rawat, Deputy Commandant, Assam Regimental Center kum u symbud kongsan lem bad kiwei kiba la shah khot sngewbha. Haba ai jingkren ha kane ka sngi, na ka liang jong u Peter Hanaman u la ai khublei ïa nongïalehkai kiba la khur takma bad ai ka jingïaroh ïa ka jingtrei shitom wat hapdeng ka jing eh. U la bynrap ruh da kaba pynpaw ba ka long kaba donkam ban pynlong ïa kum kine ki lympung khnang ban sei madan ïa ki nongïakop siat ba kynsai napoh ka jylla bad ruh na ka bynta ka thaiñ North East baroh kawei.
Ha kane ka kynti ba mynta, ki la don haduh 270 ngut ki nongïakop siat kiba mihkhmat na kine ki hynriew jylla jong ka thaiñ North Eastern States bad ki dkhot ka Assam Rifles Marksmen unit & Army Marksmen Unit, lait noh ka Sikkim bad Tripura kiba la ïashimbynta ha kane ka Championship.
Ka Assam ka la long ka lahduh ha kane ka jingïakop siat hadien ba ka la bat kyrdan ba nyngkong ha ka miej khur takma da 27 ksiar, 13 tylli ki rupa bad 13 tylli ki rnong. Ka Mizoram ka la wan ha ka kyrdan ba ar, da 18 takma ksiar, 10 tylli ki takma rupa bad 9 tylli ki rnong. Bud sa ka Assam Rifles Marksmen uni ha ka kyrdan ba lai da 12 ksiar, 3 rupa bad 9 rnong. Na ka liang jong ka Meghalaya ka la khur 3 tylli ki ksiar, 6 rupa bad 4 tylli ki rnong bronze katba ka Manipur ka la khylliap ïa kane ka Championship da 10 tylli ki rupa bad 7 rupa. Ka Nagaland ka la khur 6 tylli ki rupa bad 3 tylli ki rnong, ka Army Marksmen Unit (AMU) ka khur 6 ksiar, 4 rupa bad kawei ka rnong.
La ïoh ruh ban sam ïa ka khusnam ba kyrpang ha ka thup 10m Air Pistol Championship (Deaf Women) sha ka Upanksha Sarma na Assarm. Bad ka jingsam ïaki Certificate da u Kongsan bad symbud kongsan sha katto katne ngut kiba la pyndep ïa ka NRAl National Judges Course (Rifle & Pistol).
La khylliap pyrda ïa kane ka Championship da kaba aiti ïa ka lama da u John F Kharshiing, President ka SAM sha u Merang Jamir, President ka Nagaland Rifle Association ka ban sa ïoh ban pynlong ïa ka 11 North East Zone Shooting Championship 2024.
