La plie pyrda ïa ka 1st Memorial (L) Rowell Lyngdoh KFT 2022 ha madan St. Mary Mini Stadium Rangblang

Mawkyrwat, Risaw 28 : Kum shibynta ban kynmaw burom ïa u (L) Rowell Lyngdoh uba la noh synñiang shibun ïa ka South West Khasi Hills District bad ïa ka jylla Meghalaya baroh kawei, ka Meghalaya Pradesh Trinamool Congress jong ka Mawkyrwat Block Committee ka la ïoh ban pynlong ïa ka lympung ïalehkai kynjatbol ba la tip kum ka 1st Memorial (L) Rowell Lyngdoh Knockout Football Tournament 2022 ha madan St. Mary Mini Stadium Rangblang, South West Khasi Hills District.
U bah Sounder Strong Cajee u ban sa ïa ai reng ha ka MLA Election jong u snem 2023 na ka Trinamool Congress u la long kum u kongsan bad uba la pynher ruh ïa ka lama kum ka dak ka plie pyrda ïa katei ka lympung ïalehkai kynjatbol.
Ha kane ka lympung ïalehkai la ïoh ban pynïalehkai sdang hapdeng ka Myriem Sports Club pyrshah ïa ka Rangblang Pambriew ha kaba ka la long da shisha kaba i shongkun ha ka jingsakhie lang da ki paidbah jong thaiñ ha ryngkat ruh da ka jingpynshit pynshngaiñ shuh shuh da ki jingshad bad ki jingrwai na ki samla jong ka thaiñ Rangblang. Ha kajuh ka por na ka liang u bah Cajee u la ïoh ruh ban ai sngewbha da ki jersey ïalehkai sha ki Sports Club bapher bapher jong ka dong ka thaiñ Rangblang.
Ha kaba ïa kane ka 1st Memorial (L) Rowell Lyngdoh Knockout Football Tournament 2022 ynsa pynlong ha ki saw tylli ki jaka ne ki zone hapoh jong ka Mawkyrwat Constituency ha kaba ki la ïoh ban plie pyrda noh shwa ha ka Rangblang Zone.
U bah Sounder Strong Cajee haba kren ha ka jingïalang u la ong ba ka jingpynlong ïa kane ka lympung ïalehkai kynjatbol ka long kum shi bynta ban kynmaw burom ïa u ‘riew khraw pyrkhat jong jylla u bah (L) Rowell Lyngdoh u nongmihkhmat barim jong ka Mawkyrwat Constituency bad ruh uba la bat teng kum u Symbud Myntri Rangbah jong ka jylla ha ki por ba la leit ha ka u ka leh shibun ki kam bah ha kaba u la lah ruh ban pynïoh noh la ka jang ka distrik ïa ka South West Khasi Hills bad kiwei de ki kam ba u la noh synñiang ïa ka jingmyntoi jong ki ba bun ba lang hapoh jong ka distrik bad ka jylla ruh kumjuh.
U la kyntu ruh ïa ki samla jong kane ka dong ka thaiñ ba lada ki kwah ban pawnam kum u Messi, u Ronaldo ki dei ban trei shitom bad kiar na ki kam sngewbha na ki kam dih kiba pynsniew ïa ka jingim jongki. U la bynrap ruh ba ki kam ïalehkai ha ki juk ba mynta kim dei shuh kum ka kam ïalehkai sngewbha hynrei ka la dei kawei na ki kam pynïoh kam pynïoh jam ban ïoh kamai pisa lyngba ki sap ba ki don. “Bunsien ki ‘riew khraw kiba ju paw ha ka pyrthei ki dei kiba wan na ki na kyndong kynshrot na ki longïing kiba duk, kumta ngim dei sngewdiaw mynsiem pyni ïa la ka sap ka phong ha ka pyrthei kaba phi phi don bad na ka ka liang jong u un sa btin lynti ha kino kino ki bynta lyngba ki buit ki bor jong u ba un btin lynti lem ïa ki samla kiba don ïa ka sap ha kino kino ki bynta”, ong u bah Sounder bad baroh u briew uba stad mano lah lah ban tip ïa ka lada khlem plie ka lad kumno u lah ban pyni ïa lade ha ka pyrthei.
Haba bynrap shuh shuh ïa ka jingkren, u bah Sounder u la ong ruh ba kum ki samla ki dei ban buh ka thong ban pyni ïa ka sap ym tang hapoh jong ki shnong ki thaw hynrei buh ïa ka thong ban ïoh mihkhmat hapoh ka distrik, ka jylla bad ha ka pyrthei hi baroh kawei namar lyngba ka jingpynlong ïa ka kum kine ki jait jingïalehkai ka dei kum shibynta ban kyntiew ïa ki sap ki phong jong ki samla bad kumjuh kum shi bynta ban pynlait ïa ki samla na ki jingsniew namar ba lada ki samla ki pynlut ïa ka por ha kum kine ki kam ïalehkai bapher bapher kan shim ïa ka por ban kin ïoh ban ïa kilanmet noh ban klet noh ïa ki kam sniew ba bun jait.
Ha kane ka sngi la ïoh ka jingkren lyngkot na u Rev. Fr. Alphonsius Rongrin, na u samla Benjohnson Lyngdoh, President ka MCSEPAC Youth bad kiwei de ki ‘riew Rangbah kiba la ai mynsiem ïa baroh ki kynhun ïalehkai kynjatbol kiba la wan shimbynta ha ka 1st Memorial (L) Rowell Lyngdoh Knockout Football Tournament 2022 kiba don haduh 32 tylli ki kynhun kiba la ïoh ïa shimbynta.