Shillong, Risaw 28 : Ka Mawkynrew Cup Committee ha ka sngi Thohdieng ka la pynbna ba kan pynlong da ka tamasa ïalehkai phutbol ba la tip kum ka (L) Jien Pyngrope Memorial naduh ka 01 tarik u Naiwieng mynta u snem ban kynmaw burom ïa utei u rangbah ba ka thaiñ Mawkynrew baroh kawei ka ñiew burom bha.
Haba pynbna ïa kane u Coordinator jong ka Mawkynrew Cup Committee Bah Tympang Pohshna u la ïathuh ba ki don haduh 16 tylli ki klob kiban wan shim bynta ha katei ka lympung kynthup naduh ka klob ba pawnam ka Shillong Lajong.
La pynbna ruh ba ka khusnam na ka bynta ka kynhun ba rah ïa ka nam lahduh kan khur ïa ka song pisa kaba 1.5 lak tyngka katba ka kynhun ba wan ba ar pat kan khur ïa ka song pisa ba 80hajar tyngka. “Kin don ruh bun kiwei kiwei ki khusnam na ka bynta ki nongïalehkai,” ong u Bah Pohshna.
Na ka liang u Secretary ka Committee Bah Ïakmenlang Wankhar u la pyntip ba ka jingpynlong ïa katei ka lympung kadei ruh da ka jingtreilang bad ka tnad ïalehkai jong ka sorkar jylla khamtam da ka jingkyrshan borbah u MLA ba dei ruh u Myntri ka tnad ïalehkai ka sorkar jylla, Bah Banteidor Lyngdoh.
