La kajong ka Thermal Plant buh thong ka Sorkar jylla ban sdang ha Meghalaya

Shillong, Naitung 04: Ka Sorkar Meghalaya ka dang bishar bniah ïa ka jinglah ban seng noh ïa ka Thermal Power Plant la ka jong ha Jylla kum shi bynta ban pynthikna ïa ka jingsam bording kaba pura bad khlem jingthut, wat hapdeng ka jingnang duna ka jingpynmih bording na ki Hydro Power Project bad ka jingkiew ka dor jong ka bording ba thied na shabar.
Ïa kane la pynpaw da u Commissioner & Secretary ka Tnad Bording, Sanjay Goyal, haba kren sha ki lad pathai khubor. Katkum ka jingong jong u, ka Sorkar mynta ka dang ïai bteng ïa ki jingïakren bad ki kompeni ban pyntrei kiba pynpaw ïa ka jingkwah ban pyntrei ïa ki Thermal Power Project ha Meghalaya.
U Goyal u la pyntip ba ka Tnad ka la ïoh pdiang ïa katto katne ki Expression of Interest na ki kompani bapher bapher, hynrei ka kam ka dang don ha ka jingbishar bad ym pat poi sha kano kano ka rai kaba khatduh.
U la ong ruh ba ha ka liang ka jingdon bording thermal, ka jylla kam pat mad jingeh namar ka dang ïoh ïa ka bording lyngba ka jingïateh bad ka NTPC, Bongaigaon. Watla katta, ka Sorkar ka dang peit bniah ïa ka jinglah ban don noh da ka Thermal Power Plant la ka jong ban pynkhlain ïa ka jinglah ban pynbiang bording ha ki snem ban wan.
Katkum ka jingong jong u, ka polisi jong ka Tnad Bording ka long ban ym shaniah tang ha kawei ka tyllong pynmih bording, hynrei ban pynbun ïa ki lad pynmih bording lyngba ka hydro, thermal bad ka renewable energy khnang ban pynthikna ïa ka jingshngain ha ka liang ka bording.
Haba kren halor ka jingdawa bording ha jylla, u Goyal u la ong ba mynta ka Meghalaya ka donkam hapdeng 180 haduh 200 megawatt ka bording, hynrei ka jinglah ban pynmih bording ka jylla ka shong bun eh ha ka jingbun jong u slap.
U la batai ba lada baroh ki power station ki treikam katkum ka bor kaba pura, ka jylla ka lah ban pynmih palat 200 megawatt ka bording. Hynrei, kam donkam ban pyndonkam lut ïa baroh ki station ha kajuh ka por namar ka jingtreikam ka shong ruh ha ka jinglong jingman jong ka mariang.
U la ong ba ka Tnad ka pynbeit ïa ka jingpynmih bording katkum ka jingïoh slap, da kaba pynleit jingmut kyrpang sha ki project kum ka Leshka bad ka Ganol. Ha kajuh ka por, ka Umïam Reservoir ka dang iai long ka bynta kaba kongsan tam ha ka rukom pynïaid ïa ka jingpynmih bording, namar ka um ha kane ka pung la pyndonkam da kaba antad ban pynthikna ba kan biang ha ki por ba duna slap.