La dep khot tender ban pynheh ïa kad Liengsuiñ Shillong ha Umroi shen yn sdang noh ka kam

Shillong, Iaiong 21 : U Symbud Myntri Rangbah ba khmih ïa ka Tnad Transport u Bah Sniawbhalang Dhar ha ka sngi Ba-ar, ula pyntip ba ka Airport Authority of India (AAI) ka la dep ban ai tender ban pynheh ïa ka kad Liengsuiñ Shillong kaba ha Umroi bad la khmih ruh ba ka jingpyntrei ïa ka project kan sa sdang noh shen. `“ïa ka tender lah dep ban ai na ka bynta ban pynheh ïa ka Kad Liengsuiñ. Lehse u Contractor un sa sdang noh shen ïa ki kam” ong u Bah Sniawbhalang haba ïakren bad ki nongthoh khubor haba kylli halor ka jinglong jingman ba mynta jong kane ka project.
“To ngin peit. La ïohi ba ka por ba u contractor un pyndep ïa ka kam ka long 18 bnai” ula bynrap haba pyntip ba ula pan ruh ïa ka jingtip ba pura shaphang u contractor bad ki plan ba thmu ban pyntrei.
“Nga la bthah ïa u Commissioner of Transport ba un ïakren bad ki naba ngi kwah ban tip mano ba dei u contractor bad kiei ki kam ba un pyntrei. Lehse ha u bnai ban wan, ngin sa tip mano ba dei u contractor, kaei ka dor ba ki buh, bad kaei ka por ba kin pyndep” ula bynrap.