Halor ka jingshah btep ka kali ha ka khyndew bad maw ha Mawlieh bad ïap 2 ngut

Shillong, Iaiong 21: Ka Sorkar Jylla ka la bthah ban pynlong ïa ka jingtohkit halor ka jingkhyllem ki maw bad jingtwa ka khyndew hajan Mawlieh haka 20 tarik mynta u bnai, kaba la shim ïa ka jingim jong ki arngut ki briew ha ka sngi Ba-ar bad u Symbud Myntri Rangbah ka Jylla Bah Prestone Tynsong ula bthah ïa ki bor district, pulit bad ïa ka National Highways and Infrastructure Development Corporation Ltd (NHIDCL) ba kin khmih bniah ïa kaei kaba lam sha katei ka jingjia ka ban long bniah bha.
“Ka long kaei kaei ka jingjia kaba sngewsih ba hynin, la duh noh ïa ka jingim ba kordor jong ki arngut namar ka jingjia ba ki mawbah mawsan ki la tyllun bad hap ha kawei ka kali pick-up bad kitei arngut kila khlad noh ha shen” ong u Bah Prestone Tynsong ryngkat bad ka phah ïa ka jingsngewlem sha ki bahaïing jong kine kiba khlad noh.
Kine ki arngut kiba la khlad noh la tip kyrteng kum u Wanbor Nianglang 40 snem ka rta na Pynursla bad u Nangteibor Khongthohrem 46 snem ka rta uba na ka shnong Lumwahniai.
U Bah Tynsong ula ong, ba ula bthah ba dei ban pynlong noh mardor ïa ka jingtohkit halor katei ka jingjia.
“Hynin ka sngi hi, nga lah bthah ïa u SDO Civil bad ïa ka kynhun jong ki pulit hapoh ka jingïalam jong u SDPO Pynursla. Nga lah kren bad bthah ruh ïa ka NHIDCL ryngkat bad ka kynhun ka jongka bad wat ïa ka kompani kaba pyntrei ïa ka projek jong ka Package-II ba kan khmih bniah biang halor ka jinghap jong ki mawbah mawsan kaba la lam sha ka jingiap jong ki arngut ki briew” ula ong.
Hynne ka sngi kala don ka jingleit jurip lang hapdeng ki ophisar jong ka tnad PWD bad ki bor pynïaid district. “Nga lah bthah bad hynne ka sngi ki la leit kum ka kynhun baroh kawei ki la leit naduh na ka kyrdan jongu Executive Engineer, ki la leit shatei bad ha ka jingdonlang jong SDO Civil, BDO bad ruh ha ka jingdonlang kiba don bynta ha ka kam bad dei halor kane ba ngi lah rai ba dei ban khang shwa shipor ïa kane ka surok kaba lah ban long 2-3 sngi” ong u Bah Tynsong.
Ula kyrpad ïa ki paidbah ba kin ai ïa ka jingïatreilang ha ka por ba khang ïa ka surok.
“Nga kyrpad da kaba sngewrit ïa baroh kiba don bynta, khamtam eh ïa ki paidbah na ka constituency jong nga, ba kin long kiba shah shitom shipor bad ngi, mynta ngi kwah ban phaikhmat sha ka bynta khamtam ïa kaba ym shngaiñ ha ka ban ïaid lyngba ha katei ka jaka. Kumta nga kwah ban kyrpad ïa baroh ki paidbah jong ka thaiñ Pynursla ban sngewbha ban ïatreilang bad ngi bad ai ba ki bor pynïaid district kin shim khia halor kane ka mat” ong u Bah Tynsong.
Ha kaba ïadei bad ki sienjam ban lah pynbeit shi rta ïa kane ka kam, u Symbud Myntri Rangbah u la ïathuh ba mynta kin dang donkam ban shim shuh shuh ïa ki jaka.
“Mynta ngi lah shim ïa ka rai ba donkam ban shim shuh shuh ïa ki jaka hynrei na ka bynta kane ngam pat ïoh satia ïa kano kano ka jingtip kaba thymmai hynrei ka rukom pyrkhat ka long ba ngin shim shuh ïa ki jaka ha katei ka bynta, khnang ba yn lah ban pynkhuid baroh shi syndon ïa ka jingtwa khyndew” ula ong.