Khliehriat, Nailar, 31: Ki bor sorkar ka Meghalaya lyngba ki bor district jong ka East Jaiñtia Hills District,hapoh ka jingïalam jongka ADC East Jaiñtia Hills District, ka kong J.U.Kharpuri ha ka jingdon ryngkat lang u heh pulit, uba dei u incharge jong ka Umkiang Patrolling Post, u R.Das hynne ka step ki la leit ban kit noh ïa ka metiap jong u nongïalam ka Awami League, uba na Bangladesh, u Ishaque Ali Khan Panna sha khappud ka India bad Bangladesh kata ha Dawki- Tamabil bad la aiti noh ïa ka met ba sah sha ki bor jong ka ri Bangladesh bad kiba haïing hasem.
ïa ka met jong une u rangbah la pynkit na Civil Hospital Khliehriat ha ka step sngi Saitjaiñ bad la dep ruh ban leh ïa ka postmortem ha Khliehriat Civil Hospital.
Kum ban shu pynkynmaw, ïa ka met jong u (L) Ishaque Ali Khan Panna , la lap da ki briew ha ka 26 tarik mynta u bnai na kawei ka bri kwai kaba don ha shnong Dona Bhoi, East Jaiñtia Hills District, na ka jaka kaba jngai tang kumba 1.5 kilometer na ka khappud Indo-Bangladesh, la ithuh ba u dei na Bangladesh dei hadien ba la ïoh ïa ka passport na ka met jong u bad mynta ka sngi hadien ba la dep leh lut ïa kiei kiei kiba katkum ka aiñ bad ha ryngkat ka jingïa don lang ki heh pulit bad heh sorkar kiba na West Jaintia Hills District lem bad ki heh shipai BSF bad ki shipai jong ka Border Guard Bangladesh ïa ka met ba sah la aiti noh sha ki ba ha ïing bad ki bor ba halor jong ka ri Bangladesh.
ïa ka met la shimti da kiba haïing bad ki bor ka Bangladesh hadien ba la pyndep lut ïa ki jingkwah jongki ban ïoh ïa ka kaiphod Post Mortem kaba shai bha na kata ka daw la shimti haduh ha ka por shiteng sngi.
U Panna u dang mut ban wan phet rieh sha India hadien ba ka sorkar Awami League ka la khyllem bad ka Sheik Hasina kaba dei ka Myntri Rangbah Duh jongka ri Bangladesh ruh ka la wan phet rieh sha India. Hynrei la kynnoh ba u la iap na ka jingbthei u klong snam katba u dang mut ban jam shapoh u pud u sam ka India. Kawei pat ka tyllong khubor ka ïathuh pat ba ka daw ka jingiap jongu ka lah ban dei ba u shah siat ha ki bor pahara khappud ka Bangladesh ki BGB.
Namar ha katei kajuh ka sngi ba iap u Panna don sa kawei ka metiap kaba dei jong u khun u Raffikul Islam la lap najan ka ïing u Saddam ha ka shnong Donachera kaba jngai tang kumba 400 km na khappud. La ïathuh ba u Saddam mynta u dang shah tohkit namar la suba jur da ki BGB ba u ïarap ïa ki nong Bangladesh ban ioh rung sha u pud u sam ka India khamtam ïa kiba heh ba haiñ. Uwei na kiba thmu ban phet rieh sha India u dei Nongbishar ba rim ka Supreme Court ka Bangladesh u AHM Shamsuddin Chaudhary Manik uba rah ruh haduh 40-50 lak tyngka ka pisa Bangladesh. Hynrei la suba ba une u Saddam u la shet kylla ïa utei u nongbishar bad kumta u la shah kem katba ïa u Panna la suba ba la shu siat iap beit hapoh u pud u sam ka Bangladesh hynrei sa wan bret pat ïa ka met jongu shapoh u pud u sam ka India.
