Shillong, Nailur 01 : Ki kynhun ba kham paw ha ka Meghalaya Youth League 2024 ki la nang ïai bteng ïa ka lynti ïaid jong ki da ka jingjop ha ka sngi ïakhun kaba 7 kaba long ha kane ka sngi saitjaiñ.
Kiba hakhmat eh napdeng kine ki long ka West Jaiñtïa District Sports Association ha ka Zone B, kaba la jop ïa ka jingïalehkai U-14 jong ki pyrshah ïa ka East Jaiñtia District Football Association da 9-0kol. Ïa ka kynhun la lamkhmat da ka hat-trick na u Kaisarmi Dkhar. Hynrei ha ka kyrdan U-16 pat ka East Jaiñtia ka la lah ban pynneh da ka jingïakhaid kaba mar 2-2 kol pyrshah ïa ka West Jaiñtia.
Ka West Jaintia ka dang don hakhmat eh ha baroh ar tylli ki rta ïakhun da kaba kamai 15 poiñ ha ka U-14 bad 13 poiñ ha ka U-16. Ka Amlarem Block Sports Association kaba wan ha ka kyrdan kaba ar kam shym la don bynta ha kane ka jingïakhun mynta ka taiew.
Kiwei pat ki jingïakhun ha kane ka zone la ïohi ba ka Laskein Block Sports Association bad ka Saipung Block Sports Association ki la ïasam poiñ ha ka kyrdan U-14 hadien ka jingïakhaid khlem thep kol shwa ba ka Saipung kan pynliem ïa ka Laskein da 3-0 kol ha ka U-16.
Ka la don tang kawei ka jingïakhun ha ka Zone A kaba dei ka jingïakhun kaba khatduh eh jong ka kynhun U-16 ha kaba ki nongïalam jong ka Williamnagar District Sports Association ki la pynliem ïa ka North Garo Hills District Sports Association da 3-0. Kane ka pynlong ïa ka Williamnagar ban don 10 point katba ka NGH da ki 5 point.
Ha ka Zone C, ka Shillong Sports Association ka la ïakhun ïa ka Sohra Sports Association bad ka la jop da 4-0 kol ha ka U-14 bad da ki 8-0 kol ha ka U-16. Ka Ri-Bhoi District Sports Association kam shym la ïakhun ha kane ka sngi kut taiew hynrei ka dang ïai bteng ban don ha khlieh duh da kaba tam ha ka miej pyrshah ïa Shillong da 1 point ha baroh ar tylli ki kyrdan.
Ka Zone D ka la long kaba shongshit bha, watla ka don tang kawei ka jingïakhun kaba noh shilliang hadien ba ka Eastern Border Sports Association ka la pynliem da 6-0 kol pyrshah ïa ka Mawshynrut Sports Association ha ka rta ïakhun kiba U-16.
Ka jingjop kaba 1-0 kol na ka bynta ka Pyndengumiong District Sports Association ha ka kti jong ka Tyrsad Area Sports Association la ïohi ïa baroh ar ka Eastern Border bad ka Tyrsad ban tam ïa ka Pyndengumiong ha ka thup khur point.
Kawei pat ka jingïakhun U-16 ka la kut da ka jingïakhaid mar 1-1 kol bad ka Nongstoin District Sports Association pyrshah ïa ka Mawkyrwat District Sports Association. Kine ki arliang mamla ki la ïakhaid ruh da kajuh ka kol ha ka U-14.
Ha kajuh ka por ka Pyndengumiong ka la pynliem ïa ka Tyrsad Area da 2-0 kol bad ka Eastern Border ka la pynliem ïa ka Mawshynrut da 1-0 ha kiwei pat ki ar tylli ki jingïalehkai U-14.
Ka result ha ka thup ïakhun U-14 ha ka 31/09/2024-
Zone B – East Jaintia FA 0 – 9 kol West Jaintia DSA
Zone B – Laskein Block Sports Association 0 – 0 Saipung Block Sport Association
Zone C – Sohra Sports 0 – 4 Shillong Sports Association
Zone D – Mawkyrwat DSA 1 – 1 Nongstoin DSA
Zone D – Pyndengumiong DSA 2 – 0 Tyrsad Area Sports
Zone D – Eastern Border Sport Association 1 – 0 Mawshynrut Sports Association
Ka result ha ka thup ïakhun U-16 result
Zone A – Williamnagar District Sports Association 3 – 0 North Garo Hills District Sport Association
Zone B – East Jaintia District Football Association 2 – 2 West Jaintia District Sports Association
Zone B – Laskein Block Sports Association 0 – 3 Saipung Block Sports Association
Zone C – Sohra Sports Association 0 – 8 Shillong Sports Association
Zone D – Mawkyrwat District Sports Association 1 – 1 Nongstoin District Sports Association
Zone D – Pyndengumiong District Sports Association 0 – 1 Tyrsad Area Sports Association
Zone D – Eastern Border Sport Association 6 – 0 Mawshynrut Sports Association.