Kyrshan ki sengbhalang ïa ka jingthmu ka MeECL ban tei ïa ka Myntdu-Leshka Stage-II

Shillong, Jymmang, 08: Ka Joint Action Committee jong ki sengbhalang na rilum Jaintia kiba kynthup ïa ka Jaiñtia Students Union, ka Jaintia Youth Federation bad ka East Jaintia Council ki la aiti da ka jingthoh ha u Deputy Commissioner jong ka East Jaiñtia Hills District ban ai jingkyrshan ïa ka Meghalaya Energy Corporation Limited (MeECL) kaba la thmu ban tei ïa ka shlem pynmih bording Myntdu-Leshka Hydro Electric Project Stage-II khnang ba kan pynmyntoi ïa ki paidbah nongshong shnong jong ka Jylla Meghalaya.
Ha ka dorkhas ba la soi da u President ka JSU u Bah Jersom Jylla, u President ka JYF u Bah OL Tariang bad u President ka EJNC u Bah Sambormi Lyngdoh, ka Joint Action Committee (JAC) ka la ai jingmut ïa ka Sorkar ba kano kano ka Agency bad ka Sorkar kin bujli ïa ki jaka khlaw na West Khasi Hills District sha Jaintia Hills District namarba ki dang bun bylla ki jaka khlaw hapoh kine ki ar tylli ki district.
Ka JAC ka la kyrpad ïa ka Sorkar bad ïa ka Agency ban pynrung kyrteng shwa ïa ki trai jylla kiba la kham tbit kum ki nongtrei ha kino kino ki kam bad ba ka jingthmu jong kane ka projek kan long beit ban aikam aijam shwa ïa ki trai ri trai muluk.
Na ka bynta ki nongtrei ha ki kam kiba kham jwat (technical), ka JAC ka la kyrpad ïa ka Agency ban ailad shwa da ki trai jylla bad lada ki trai jylla ki duna, ka Agency ka lah ban wanrah nabar ka jylla kiba don ïa ki kot ki sla kiba biang bad ban pan jingbit na ka bynta ban aplai ïa ka Labour License bad ïa ka syrnot na ki bor ba dei peit.
Ka projek ka dei ban pynmyntoi khamtam eh ïa ki trai jylla bda ïa ki paidbah jong ka West bad ka East Jaiñtia Hills District, la ong ka JAC.
“Ngi kyntu ruh ïa ka Sorkar bad ïa ka Agency ban kynthup lang ïa ka shnong Borghat hapoh ka Local Area Development namarba kan dei kawei na ki shnong ka ban shah ktah ynda la shna ïa ka dam ha ki sngi ki ban sa wan,” la ai jingmut ka JAC.