Pynskhem u Lamphang ïa ka jingïathoh ki MLA ka PDF bad ka NPP

0

Shillong, Jymmang 08 : U Lamphang ka Ïingdorbar Thaw Ain U Thomas A Sangma, ha ka sngi Nyngkong, u la aiti ïa ka shithi ba la ithuh ka Ïingdorbar ïa ka jingleit pynïasnoh ki MLA ka PDF sha ka National People’s Party (NPP).
Kine ki MLA ka PDF ki dei u President ka party bad MLA ka Sohra Bah Gavin M Mylliem bad u Working President bad MLA ka Mawkynrew Bah Banteidor Lyngdoh.
Haba ïakren bad ki nongthoh khubor, u President Bah Gavin M Mylliem u la ong ba ki la wan sha ophis treikam u Lamphang ban shim ïa ka shithi ai jingithuh da ka Ïingdorbar ïa ka jingleitpynïasnoh ki MLA ka PDF sha ka NPP, kat kum ka shithi ba ki la phah sha u Lamphang ha ka 5 tarik Jymmang.
Da kane ka jingpynskhem u Lamphang ïa ka jingpynïasnoh kine ki ar sha ka NPP kin lait na ka aiñ jong ka kyntiap seng ban shah mait kyrteng.
Kah ban kdew ba ïa ki MLA ka PDF bad ki nongkyrshan ka PDF la pdiang sngewbha sha ka NPP da u National President ka NPP uba long u Myntri Rangbah ka Jylla Conrad K Sangma ha ryngkat ïa ka jingsynran lang ki nongïalam ka NPP.
Lah ban pynkynmaw hangne ba u Vice President ka NPP uba long u Symbud Myntri Rangbah u Bah Prestone Tynsong u la ong ba kane ka jingwan pynïasnoh ki MLAka PDF ka long kum ka “soskular kyntiew kurim ne ka jingïathoh shongkurim uba la ong ruh ba kane ka jingïathoh shongkurim ka NPP bad PDF kan neh haduh ba kut bad “tang ka jingïap kaban pynïakhlad”.

Leave A Reply

Your email address will not be published.