Jowai, RIsaw 28: Ka Jaiñtia Hills Development Society (JHDS) ha rynkat ka jingïatreilang bad ka Ophis jong ka KHUBLEI Germany kala plie paidbah sa kawei pat ka ïing baduk ïa kaba la tei kyrpang da kitei ki organization na ka bynta ka ïing ka sem jong ka Kong Smiti Phawa ba shong basah ha Lumpyrdi Mihmyntdu.
Ïa kane ka ïing la plie ha ka 28th October 2023 da u Chairman ka Balang Katholik Mihmyntdu, u ma Lamshwa Chyrmang ha rynkat ka jingïadonlang u Director ka JHDS u Fr. Manbha Pakem, u ma Denis Kurkalang, Coordinator JHDS, ma Ialammi Lyngdoh, General Secretary Balang Katholik Mihmyntdu, u ma Fedrick Synnah ryngkat bad kiwei de ki Rangbah.
La ïathuh ba ïa kane ka ïing la shna bad pynbit pynbiang da ka JHDS ryngkat bad ka jingkyrshan na kawei ka Longkmie kaba na ka Ri Germany ka Agathe Glucker.
Shuwa ban ot ïa u Ribbon, la don ka jingïalang ba lyngkot ïa kaba la pynïaid da u ma Fedrick Synnah, Ex-Chairman Balang Katholik Mihmyntdu bad la ïoh ka jingkren ba lyngkot na u ma Lamshwa Chyrmang, na Fr. Manbha Pakem bad ka jingkren sngewnguh na ka trai-ïing ka kong Smiti Phawa.
Haba ai jingkren, u Director ka JHDS ula pynpaw ka jingsngewnguh ïa baroh kiba don kti bad kyrshan ban pynshna ïa kane ka ïing baduk kaba donkam jingïarap. Ula kyntu ruh ïa ki nongïoh kynti ïa kane ka ïing ba kin sumar bha ïa kane ka ïing khamtam eh ban don ka jingïaieid ka jingïasngewthuh jingmut shiïing shisem khnang ban wanrah ïa ka longïing longsem kaba bha ba miat bad basuk basaiñ.
Hadien ka jingkyrkhu ïa ka ïing da u Fr. Manbha Pakem, la ïoh shuh shuh ïa ka jingkren sngewnguh na ka liang ka Kur Phawa ïa kaba la ai da u ma Sahon Phawa, President ka kur Phawa Mihmyntdu Unit. Uba la pynpaw ka jingsngewnguh ïa kiba donkti ban pynshna ïa katei ka ïing baduk.
