Haduh 2.77 klur la sdang ban tei ïa ka ophis bapura ka C&RD Block Jirang ha Ri Bhoi

Nongpoh, Risaw 28: Ka jingangnud ki paidbah ka thaiñ Western Ri Bhoi ha Ri Bhoi District ban ïoh noh da kata ka ophis ba pura jong ka ophis u Block Development Officer ka Jirang C&RD Block ha Ri Bhoi kaba la ïai ap la bun phew snem mynta ka la urlong noh bad kane ka jingshiah ka paw ka dei hadien ba u MLA ka Jirang Constituency, u Bah Sosthenes Sohtun ha ka sngi Thohdieng jong ka taiew u la leit ban buh syndon ïa u mawnongrim na ka bynta ban tei ïa katei ka ophis ba pura jong ka Jirang C&RD Block.
Kane ka jingurlong ban ïoh noh ïa katei ka ophis ba pura ba pura ba la tip kum ka Block Integrated Development Complex ha Jirang Block, ka dei da ka jingshim khia u MLa, u Bah Sosthenes Sohtun, ba ka sorkar ka la mang tyngka lyngba ka skhim ba la tip kum ka Group IX ha ka jinglut kaba la kot sha ka Rs. 2.77 crores.
Ban pynsah jingkynmaw ïa u mawmer ka jingïaid lynti ban ïoh ïa kane ka ophis ba pura jong katei ka Block ha Jirang, u MLA ka Jirang Constituency, u Bah Sosthenes Sohtun u la wan ban buh mawnongrim ïa ka jingtei katei ka ophis sorkar ha kaba ka kam ka la ïaid shaid shaid bad ha kane ka sngi la buh ïa u mawnongri, la don lang ruh naduh u Director ka Rural Development, u S.C Sadhu, u MDC ka Jirang, u Bah Balajied Rani, u Block Development Officer ka Jirang Block, u Dr. P.R Hajong, u PD ka DRDA, u Raja Brahma, u SDO ka Civil Sub Division, u Bah M.B Tongper, kiwei kiwei ki ophisar bad kynthup ki nongïalam shnong ka thaiñ Western Ri Bhoi.
Kane ka jingïoh ïa ban tei ïa katei ka ophis ba thymmai jong ka Jirang Block ka jingkmen kam dei satia tang ïa ki nongtrei sorkar bad ki ophisar, hynrei naduh ki nongïalam shnong, nongïalam Raid bad Hima ba hap hapoh ka thaiñ Western Ri Bhoi ki la pynpaw lang ïa ka jingkmen ban ai ka nam bad ka burom ïa u MLA, uba la shim khia ban pynïoh bad ban pynurlong ïa ka jingangnud ki paidbah ban ïoh noh da kata ka ophis treikam ba pura ban dang ai ka jingshakri kaba paka na ka bynta ka roi ka par bad ka bha ka miat ki paidbah hapoh katei ka thaiñ Western Ri Bhoi.
Haba ai jingkren ha kane ka sngi kum u kongsan, u MLA ka Jirang, u Bah Sosthenes Sohtun, u la ai khublei kyrpang ïa ka sorkar MDA ha ka jingïalam u Conrad K Sangma kum u myntri rangbah ka jylla bad dei namar ka jingphai khmat kane ka sorkar sha ki paidbah ka Western Ri Bhoi ba la ïoh ïa kane ka ophis ba pura jong ka Jirang Block.
U la ong ruh kine baroh ba bun ki kam pynroi bad kane ka ophis ka la urlong ka dei hi ruh da ka jingïatrei lang jong ki paidbah bad ki ophisar ha kaba ka thaiñ Jirang ka la dangkiew ha baroh ki liang jong ki kam pynroi bad kum u MLA u la buh ruh ïa ka jingkyrpad sha ki paidbah ba kin dang ai ïa kata ka jingïatrei lang na ka bynta ban dan wan rah ïa shibun ki kam pynroi ha kane ka thaiñ ba ki paidbah ki dang donkam ban dang kiew ha ka longbriew ka manbriew.
Shuh shuh, u la ban khia ruh ïa ka jingdonkam ban don ka jingïatylli hapdeng ki nongmihkhmat bad ki paidbah ba ka thong jong ki nongmihkhmat hi ka long ban wan rah ïa ka jingkylla na ka bynta ban kyntiew ïa ka dong bad ka thaiñ bad khlem ka jingkyrshan ki paidbah kano kano ka kam pynroi kan nym urlong satia, u la bynrap.