Kyrpad u Myntri Rangbah ïa ka sorkar pdeng ban ai ïa ka College of Teacher Education
Shillong, Naitung 04 : U Myntri Rangbah ka Jylla Conrad K Sangma mynta ka sngi Ba-ar, ula ïakynduh ïa u Myntri ka Ministry of Education u Dharmendra Pradhan ha New Delhi bad kyrpad ban ai ïa ka College of Teachers Education (CTE) ha Jylla Meghalaya.
U Conrad ula pyntip ba ka jingïakren bad u Myntri ka Sorkar Pdeng ka long kaba seisoh bha hynne ka step. Ula ong ba ka don shibun ki nonghikai ki bym pat dep hikai pyntbit ha Jylla namar ka jingduna ki jaka ai jinghikai.
U Conrad ula pyntip ba ha kane ka jingïakynduh la ïakren sani bha halor ka jingseng ïa ka College of Teachers Education (CTE) hapoh ka Jylla.
“Nalor kane, nga la kyrpad ruh ban mynjur lang ïa ka jingkyrpad na ka Sorkar Jylla ban pyndep noh ïa ka jinghikai pyntbit ïa baroh ki nonghikai jong ki skul Secondary bad Higher Secondary da kaba pynlong ïa kawei ka prokram hapoh ka IGNOU programme bad ïa ki nonghikai skul Elementary hapoh ka NIOS Programme” ula bynrap.
U Conrad ula pyntip ruh “Ka Sorkar Jylla ka la pynkhreh ban pyntreikam ïa ka National Education Policy (NEP) kumba ka long bad haba khmih ïa ki jingdonkam, ka Sorkar ka la pan ïa ka jingkyrshan na ka Sorkar Pdeng ban lah pynbiang ïa ki jingdonkam ki tiar ki tar ha ki skul hapoh ka Jylla”.
“Nalor kane, la kyrpad ruh ïa ka Sorkar Pdeng ban kyrshan ïa ka Jylla ha ka liang ka jingai song pisa hapoh ka SSA khnang ba ka Jylla kan lah ban ïaid kat kum ki thong bad jingthmu jong ka NEP 2020” ula ong.
U Conrad ula pyntip ruh ba ka Jylla ka la kyrpad ïa ka Sorkar Pdeng ban thung noh ïa u Pro Vice Chancellor, Registrar, Finance Officer bad University Enigineer kiba la sah thylli ha North Eastern Hill University (NEHU). “Ngi la kyrpad ban thung briew noh ha palat 200 tylli ki kam nonghikai bad ki nongtrei kiba lait thylli hapoh ka University” ula bynrap.
Ula kyrpad ruh ïa ka Sorkar Pdeng ban pynjynsur ïa ki kyndon jong ka PM-USHA scheme, ka ban ai jingmyntoi ïa ki University ka Jylla, kaba dang don ha ka jingsdang jong ka jingpyntreikam.