Kyrpad ki Hmar bad Kuki ïa ka Sorkar ban ai jingïada ïa ki bahaïing ba phet na Manipur

Shillong, Jymmang, 08: Ki nongïalam jong ki jaidbynriew Hmar bad Kuki ha ka Lah Sngi U Blei ki la kyrpad ïa u Myntri Rangbah ka Jylla u Conrad Kongkal Sangma ban ai jingïada ïa ki bahaing hasem jong ki, kiba phet na ka jylla Manipur ban wan sah bad la ki bahaing hasem kiba buhai shnong ha nongbah Shillong.
Ha kajingïakren bad ki lad pathai khubor, u Sangma u la ong, “ki (nongïalam jong ki Hmar bad Kuki) ki la pan jingkyrshan katba ka Sorkar ka la lah ei ban ai khamtam ban pynthikna ba kan don ka shongsuk shongsaiñ ha nongbah Shillong. Haba ki bahaing hasem jongno jongno ki wan sha Shillong, ha kum kine ki por ba ki ïakynduh jingeh, lada ka Sorkar ka lah ban ai jingkyrshan.”
“Ngi la bthah ïa u Deputy Commissioner ban peit halor kane ka kam,” ong u Sangma.
U Myntri Rangbah u la pyntip ba ki nongïalam jong ki jaidbynriew Hmar bad Kuki ki la kypad ïa u ban pynsngew lem ïa kine ki jingeh bad ka Sorkar Pdeng.
“Shen ngan sa leit sha Delhi. Ha kano kano ka por kaba nga ïohlad khlempep nga shimkhia ïa kane ka kam khnang ba ka shongsuk shongsaiñ kan wan phai biang ha ka jylla Manipur khnang ba ka shongsuk shongsaiñ kan don ha baroh kawei ka thaiñ Shatei Lammihngi,” ong u Sangma.
Haba pynpaw ba ka jingjia ha ka jylla Manipur ka long ka jingjia kaba sngewsih, u Sangma u la ong, “sa shisien lyngba jong phi, nga kwah ban kyrpad ïa ki paidbah nongshong shnong jong ka jylla Manipura bad ïa baroh ki jaidbynriew kiba sah ha Manipur ba kin pynneh biang ïa ka shongsuk shongsaiñ bad ki jingïaumsnam kim dei shuh ban dang ïai bteng bad kano kano ka jingeh kaba mih ngin shong ban ïakren khnang ban weng ïa kane ka jingeh.”