Kut ka jingïalap elekshon ha Sohïong, mar shilliang surok ïakop pyni paid ka NPP bad UDP

Shillong, Jymmang 08 : Ka jingïalap elekshon ba khatduh ha Sohiong kaba long ha kane ka sngi Nyngkong ka la long kaba shongshit bha khamtam haba ka National People’s Party (NPP) kumjuh ka United Democratic Party (UDP) ki la pyni ïa ka jingbun paid mar shilliang surok.
Ka jaka ba ka NPP ka pynlong ïa ka jingïalap elekshon hynne ka sngi kam da jngai than eh na ka jaka ba pynlong ka UDP bad kumta ki paidbah lada ki ieng ha surok bah ki lah ban ïoh sngew kyndiang ïa ka jingkren na baroh arliang ki party.
Lah ban kdew hangne ba ka NPP ka la sei da u MLA ka thaiñ Bah Samlin Malngiang katba ka UDP pat ka la sei da u Bah Synshar Kupar Roy Lyngdoh Thabah ba dei u pyrsa jong u kyrtong ka UDP ba la khlad noh (L) Bah HDR Lyngdoh. Ka jingthep vote na ka bynta ban jied ïa u MLA ba thymmai na katei ka constituency kan long ha ka 10tarik mynta u bnai katba ka jingniew vote pat kan long ha ka 13tarik mynta u bnai hi.
Haba phai sha ka jingïalang jongka NPP, la wan ban donlang ha kane ka sngi naduh u National Vice President ka Party ba dei ruh u Symbud Myntri Rangbah Bah Prestone Tynsong bad ruh u General Secretary ka NPP Ma Sniawbhalang Dhar, nangta u MLA ka Sohra ba dang wan ïasoh thymmai sha ka NPP Bah Gavin Mylliem kumjuh ruh ki MDC jong ka party nalor ki President jong ka Women’s Wing bad ruh na ka NPYF.
Katba na ka liang ka UDP pat la wan ban donlang naduh u President ka party Bah Metbah Lyngdoh nalor ki MLA ka party kynthup naduh u Bah Lahkmen Rymbui, Bah Renik Lyngdoh, Bah Paul Lyngdoh, Bah Kyrmen Shylla kumjuh u President ka UDP East Khasi Hills Bah Titos Chyne bad kiwei kiwei.
Kumban shu kdew hangne, ki don haduh 6 ngut ki kyrtong kiban aireng ha kane kynti kynthup naduh ka NPP, UDP, Congress, HSPDP, BJP bad ka TMC.