Shillong, Lber 15: Ka Hynñiewtrep Integrated Territorial Organization (HITO) ka la phah da ka shithi sha u Myntri Rangbah ka jylla u Conrad K Sangma da kaba pynpaw ha kaba nyngkong ïa ka jingai khublei ba ka sorkar ka la kyntiew ïa ka rta thep kam na ka 27 snem sha ka 32 snem ka rta ha kaba 32 snem ka rta shaduh ka 37 snem na ka bynta ki Schedule Tribe, na ka ban thung kam ïa kiba aplai kam ha kiba bun jait ki kam ha ki tnat sorkar bapher bapher.
Ka la ong ba kane ka la plie ïa ka jingkhang ha ka ïoh kam ïohjam na ka bynta ki samla jong ka jylla ha ka por ba ka la don ka jingduna bha ha ka ïohkam ïohjam ha ka jylla manla ka sngi. “Ngi ai khublei ïa ka sorkar na ka bynta kane ka jingjop kaba la long ka jingkyrkhu ïa ki samla kiba dang wad kam ha ka jylla. Ngi ai khublei ruh ïa ka jinglah ka sorkar ban shimkam sted ïa ki kam kiba pyrshah ïa ka umlang sahlang ha kine ki sngi ba la leit,” ong u President ka HITO u Bah Donbok Dkhar ha ka shithi.
Na ka liang ka seng ha ka shithi ne ka dorkhas kaba la aiti sha u Myntri Rangbah ka la kyrpad ban kyntiew ïa ka rta jong ki samla kiba aplai ïa ki kam pulit kiba thylli ha ki shnat bapher bapher jong ka Meghalaya Police.
“Ngi kyntu ïa ka jingbha jong phi ban pyrkhat ruh ïa ka jingjia jong ka jingsar ka khlam COVID 19 bad ka Lockdown kaba la pynsangeh ïa ka jingthung kam bad ban ïaleh ïa ki eksam bad ban khmih ïa ka jingdonkam kiba aplai kam pulit, kaba la khang lad ïa kiba bun kiba kwah thep kam ban duh ban thep ïa ki kam pulit kiba lait thylli ha kiba bun ki shnat jong ka tnat Pulit da ka daw ka jingkut ka rta kaba la ktah ïa kiba wad kam khlem da la bakla hi dalade,” ong ka HITO.
Ka seng ka la pynpaw ba lyngba ka advertisement notification (dated 6 March 2024) kaba la pyllait da ka Office jong u Inspector General of Police cum Chairman, Central recruitment board, ka sorkar Meghalaya, la pynbna ba ki la don 76 tylli ki kam kiba lait thylli hapoh ka kam UB Sub Inspector, 720 tylli hapoh ka Unarmed Branch Constable, 195 tylli ki kam kiba lait ha ka kam Fireman.
La pynbna ruh ba ki la don 53 tylli ki kam kiba lait ha ka kam Driver Fireman, 26 tylli ki kam ha ka Mechanic, 205 tylli ki kam MPRO operator, 56 tylli ki kam Signal/BN operator, 1494 tylli ki kam armed branch constable/battalion constables/MPRO GD/ constable handyman, 143 tylli ki kam Driver constable.
Haba kheiñ lang baroh, ka seng ka la ong ba ki la don haduh 2968 hajar tylli ki kam ba lait thylli hapoh ki kam pulit kiban aikam ïa ki samla jong ka jylla. Ka seng ka la ong ba kan long ka burom kaba khraw bad kaba wanrah jingmyntoi lada ka sorkar ka pyrkhat ban rah biang ïa ka rta jong kiba thep kam ha kaba ïadei bad kane ka bynta.
Ka seng ka la pynpaw ruh ba ha kaba iadei bad ka jingthung ia ki nongbud hapoh ka tnat pult, kam shym la don ka jingpynbna ne ka notification/advertisement kaba la pynmih kaba la wanrah ka jingkylli ha kaba iadei bad ka jingthung kam ia ki nongbud. “Ngi kwah ban kyrpad ïa phi kaei kaba ka sorkar bad ki tnat kiba dei ban shim khia kin leh ban pynthikna ba ka rukom thungkam kan ïaid katkum ki kyndon jingtreikam na ka bynta ban thung ïa ki nongbud khnang ba kan long kaba sted bad kaba la pynkhreh kloi bad ba ïa ki jingpynbna dei ban pyllait paidbah, kumta ka donkam ïa ka jingbuddien halor kane ka shithi khnang ba kan long kaba myntoi ïa ki samla pule,” ong ka dorkhas ka HITO ba la phah sha u Myntri Rangbah.
Ha kawei pat ka liang ka Hynñiewtrep Youth Council (HYC) ka la dawa na ka sorkar jylla ban wengnoh ïa ka jingpynbna ba la pynmih dangshen ha kaba ïadei bad ka jingthmu ban thep ïa ki kam ba lait hapoh ka tnat Meghalaya police da kaba ong ba ka rai ban pynduna ïa ka rta kiba thep kam ka long ka bym lah ban pdiang.
Ha ka shithi ba ka la phah sha u Myntri Rangbah u Conrad K Sangma u President ka HYC u Bah Roy Kupar Synrem u la ong, “Namar kata ngi kyntu ïa phi ba phin shim ïa ki sienjam ban wengnoh ïa katei ka jingpynbna bad ban pynbna biang da kawei ban kyntiew ïa ka rta thep kam kiba aplai kam pulit kaba long ïaryngkat lang bad kiwei ki jylla ha ka ri India na ka bynta ki ST/SC,” u la ong.
U la ong ba katkum ka jingpynbna ba la pynmih da ka ophis u Inspector General of Police (R/PR)-Cum- Chairman, Central Recruitment Board ha ka 6 tarik mynta u bnai, ka rta jong ka kam UB Constable/Fireman/Driver Fireman/ Fireman Mechanic/MPRO Operator/Signal Operator/ AB Constable/ Battalion Constable/ MPRO GD/ Constable Handyman bad Driver Constable, ka long naduh ka 18 snem haduh ka 21 snem kaba la ailad pat 5 snem ka jingpynjlan ia ki nongthep kam kiba dei hapoh ka thup ST/SC.
“Mynta ka jingkylli ka long, shano ki samla kiba la shah pynduh ban thep ia kitei ki kam ba la pynbna kin leit? Hato ngi kwah ia ki ban long kiba shang makia ha ka imlang sahlang bad ha ka jylla baroh kawei? Hato ngi tan shapoh ia ki da kaba wanrah ia kine ki kyndon ki rukom treikam kiba kum kine?,” buh jingkylli u nongialam ka HYC.
