Shillong, Naiwieng 03: U President ka United Democratic Party (UDP) u Bah Metbah Lyngdoh u la pynpaw ïa ka jingkyrmen ba ka party lyngba ki mat treikam jong ka, ka pynpaw ïa ka jingkyrmen ba ha kane ka elekshon sha Garo Hills Autonomous District Council (GHADC) ka seng kan lah ban treikam bha.
Ha kaba ïadei bad kane haba kren sha ki lad pathai khubor ha ka sngi Nyngkong, u Bah Lyngdoh u la ong ba ka party ka la thaw ïa ka body ban khmih bniah ha kaba ïadei bad ka bha ka miat jong ka Garo Hills bad ban ïoh ruh ïa ki kyrtong kiba biang ki ban ïakhun ïa ka election.
“Ngi la aiti bad pynkham ti ha ki katto katne ki briew ne ki kynhun kiba la ithuh bad kumjuh ruh ka jingwad ïa ki kyrtong na ka bynta kane ka elekshon ban wan ha GHADC bad ha ki constituency bapher bapher,” u la ong.
Haba kylli ïa ka jingma kaba lah ban mih na ka seng Congress pyrshah ïa ka UDP ha Garo Hills, u Bah Lyngdoh u la ong, “Ngam tharai ba kan long kumta, ka politic kadei hi ka politic, bad ngam ïohi ba kan don ka jingbakla halor ki rukom treikam ka UDP.”
Kumba ka long mynta ka UDP ka don tang uwei u MDC na kane ka thaiñ, bad na ka liang u Bah Lyngdoh u la banjur ka jingdonkam ban ïoh khambun ki nongmihkhmat na kane ka thaiñ.
