Kyntu u DEO ïa ki Kyrtong bad ki nongïalam Party ban bud ryntih ïa ki kyndon ka ECI

Jowai, Rymphang 01: Ban ïoh ïa ka jingjied nongmihkhmat kaba khuid kaba suba ha kane ka General Election jong ka Meghalaya Legislative Assembly 2023, na ka liang jong u District Election Officer & Chairman Media Certification and Monitoring Committee (MCMC), West Jaiñtia Hills District ula pynmih ïa ka jingbthah bad khot ïa ka jingïatreilang jong baroh ki kyrtong bad ki seng saiñhima sima jong ka District ban bud ryntih ïa ki kyndon ba la pynmih da ka Election Commission jong ka ri India.
Kum shibynta ban bud ïa ki kyndon jong ka Model Code of Conduct, u DEO & Chairman MCMC ula pyntip ba kam dei ban don kano kano ka jingpynmih ïa ki Advertisements, ki appeals, ki jingrwai, ki lama, ki signboard, ki flex, poster, banner bad kiwei de ki rukom jingpynbna kiba yn pynmih ha ki jingthoh, ka jingsam ïa ki, lane ka jingpyni lyngba ki TV, lyngba ki radio lane ha kiwei kiwei ki rukom, kiba ïadei bad kane ka General Election sha ka Meghalaya Legislative Assembly 2023, khlem da ïoh jingbit (Certification) shwa na ka Media Certification and Monitoring Committee, na ka ophis jong u District Election Officer, West Jaiñtia Hills District, Jowai.
Kumjuh la kyntu ïa ki nongpynmih khubor (Media Houses) naduh ki Print, Electronic, Television, Radio bad kiwei kiwei ba ki dei ban long kiba husiar ïa ka jingshong suk shong shngaiñ jong kane ka elekshon, ha kaba kim dei ban pynmih ïa kino kino ki khubor kiba ïa shahliang sha u kyrtong ne ka Party, namar kane ka long pyrshah ïa ka jingtreikam jong ka Model Code of Conduct hapoh ka District jong ka West Jaiñtia Hills.