Kyntu ka ‘Volunteer for a Better Jaiñtia’ ban shah tang u kyrtong lem bad saw ki nongbud ban wan ïalap Election

0

Jowai, K’lyngkot 16 : Kawei na ki seng treimon sngewbha kaba dang shu mih thymmai kaba la tip kum ka ‘Volunteer for a Better Jaiñtia’ (VBJ) mynta ka sngi hapoh ka jingïalam u Co. Convener ma Phrangsngi Sutnga, kala leit ban buh ka jingkyrpad na ki nongïalam shnong (Waheh Shnong) hapoh ka Ri-Lum Jaiñtia halor ka nongrim ban jied ïa ki nongmihkhmat sha ki ïing dorbar thawaiñ lyngba ki jingïalang paidbah ki ban pynlong hapoh ki Dorbar Shnong bapher bapher.
Na ka liang ka seng ka buh ka jingkyrpad na kitei ki nongïalam shnong da kaba leit ïa kynduh markhmat bad ban aiti ïa ka jingthoh ha u President ka Synjuk Waheh Chnong Jowai ma A. Niangti, General Secretary ma Riquoma Rq Laloo bad u ma Bishar Shylla General Secretary Synjuk Waheh Shnong Ri-Lum Jaiñtia.
Kane ka jingthmu jong ka seng ‘Volunteer for a Better Jaiñtia’ ka long shi bynta ban pynsngew sha ki nongthep vote baroh ba kin sngewthuh ïala ka jong ka hok ban jied ïa ki nongmihkhmat ha ka liang ka shynshar paidbah ba laidluid jong ka Ri India.
Na ka liang ka seng ka la ai jingmut ba ka rukom jied nongmihkhat naduh ki MLA/MDC/MP, ha ka por ba ki wan ïalap kambas Election shapoh ki Dorbar Shnong ki dei ban shah tang ïa u Kyrtong lem bad ki saw ngut ki nongbud.
La pynsngew ruh ba ki dong kiba la pyntreikam ïa kane ka jingmut naduh mynshwa kita ki long ka Dorbar Shnong Khimusniang bad ka Dorbar Shnong Panaliar, ka seng ka ong ba kane ka ai ïa ka nuksa kaba bha tang ban jied nongmihkhmat.
La ai jingmih shuh shuh ha ka por ba don ki jingïalang paidbah hapoh ki Dorbar Shnong dei ban don tang ki trai shnong kiba wan ban sngap lem bad kitei ki saw ngut ki nongbud jong u ne ka kyrtong.

Leave A Reply

Your email address will not be published.