Ha Tuber Kmaishnong, sam paidbah u DC-EJHD ïa ki shawla sliew ding ba duna ka jingmih tdem

“Lada pyndonkam 500 tylli ki Eco-Friendly Smokeless Chulha kan pynneh pynsah haduh 7500 tylli ki dieng man la u snem ha ka mariang”

0

Khliehriat kyllalyngkot 16: U Deputy Commissioner ka East Jaiñtia Hills District, Abhilash Banarwal, IAS mynta ka sngi u la sam paidbah haduh 500 tylli ki shawla sliew ding sha ki nong shong shnong jong ka Tuber Kmai Shnong bad yn sa sam shuh shuh sa kumba 100 tylli, ïa kine ki shawla la tip kum ki Eco-Friendly Smokeless Chulha, kine ki jait shawla ki pynduna ïa ka jingmih ka tdem bad lada pyndonkam ïa kine ki shawla kan ïarap ban pynduna ïa ka jingpyndonkam shibun ki dieng ban thang namar lada thang tang khyndiat ki dieng ruh ka lah biang eh ban shet jingshet, kane kan ïarap shibun ruh ban pynduna ïa ka jingpom dieng thang na ki khlaw bad kan ïarap ban pynneh pynsah ïa ka mariang.
Haba kren kum u kongsan, ha ka jingïalang ba la pynlong ha madan Ait Nar ha Tuber Kmaishnong, u Deputy Commissioner, u la ïathuh ba hapoh ri India man la u snem ka jingiap ki briew na ka daw ba ki pyndonkam ïa ki shawla ba ju thang (Local shawla) ka poi haduh 13 lak ngut, namar ka jingring mynsiem ïa ka tdem kaba mih na ki local shawla kaba ktah ïa ka koit ka khiah, kumta u la ai khublei ïa ka shnong Tuber Kmaishnong, kaba la mih sha khmat bad shim ïa ka synjam ha kaba ki nongpyniaid shnong ki la pynpoi ïa ki kyrteng jong ki nongshong shnong kiba kwah ban pyndonkam da kine ki shawla (Eco-Smokeless Stove) bad ong ruh ba ka jing pyndonkam 500 tylli ki smokeless stove (Shawla) kan ïarap ban pynneh pynsah haduh 7500 tylli ki dieng ha ka mariang ha ka shi snem, namar ka pynduna ïa ka jingpom dieng na khlaw ban shet jingshet ha kajuh ka por kane kan ïarap ban pynneh pynsah ïa ka mariang, ha kajuh ka por kaba pyndonkam ïa kine ki shawla kan ïarap ban pynduna ruh ïa ka jinglutksan kaba kot haduh kumba T 7000 haduh T 8000 tyngka ha kaba pynlut ha kaba thied ïa ki dieng thang ha ïing, kane kan ïarap ruh ïa ka koit ka khiah jong ki longkmie kiba shet jingshet bad ki khynnah kiba don ha ïing.
La ong ruh ba ki nongshong shnong kiba ïoh ïa kitei ki shawla ki siew pisa tang mar shiteng na ka dor bad shiteng ka dor la ïarap siew da ka District Mineral Funding Trust lyngba ka jingïarap u Deputy Commissioner bad u la kular ruh ba un sa pynioh ïa kiwei kiwei ki shnong ruh.
U Waheh Shnong Tuber Kmai Shnong, u bah Miki Lyngdoh u ai ka jingkhublei sngew nguh, sngew burom ïa u Deputy Commissioner, u Abhilash Banarwal, ïa u Additional Deputy Commissioner, u bah Jonathan Shylla, ïa u Project Manager jong ka DMFT, bah Lumlangki Pohti, u Assiatnat Technical Enginerr jong ka DMFT, u bah O.Pariat bad kiwei kiwei ki heh sorkar kiba la ïarap ban pynioh ïa ki lad ki lynti kiba wanrah jingmyntoi ïa ka shnong ka thaw bad ki nong shong shnong, u la ong ba ka jingpyndonkam ïa kine ki shawla ba pynmih duna tdem kan ïarap shikatdei eh ban pynneh pynsah ïa ki dieng ha khlaw, kan ïarap ha ka koit ka khiah bad kum u Waheh Shnong, u angnud ba baroh ki longiïng hapoh shnong kin pyndonkam da kine ki jait shawla kiba ju khot ki Eco-Friendly Smokeless Chulha bad la khmih lynti ba u Deputy Commissioner un sa pynpoi shuh shuh ïa kum kine ki shawla hapoh shnong.
Kumjuh ruh, u Shongknor ba pynïaid ïa ka prokram, uba dei u Secretary Shnong Tuber Kmaishnong, u bah Telme Phawa, u ai ka jingkhublei sngewnguh ïa u Deputy Commissioner bad ki heh sorkar kiba la ïarap ïa ka shnong ka thaw da kaba wanrah shibun ki jingmyntoi hapoh shnong ki ba ïarap ban kyntiew ïa ki nongshong shnong ha kiba bun ki bynta bad ong ruh ba na ka liang ka shnong ruh kan ïai ai ka jingïatreilang bad ki bor district man ka por.
La pynbyrngia ïa ka prokram da ki jingshad tynrai na ki longkmie bad ki khun samla jong ka shnong Tuber Kmaishnong.

Leave A Reply

Your email address will not be published.