Da ki syrnod sam ka Aide et Action Umsning ïa ki dkhot SHG ba pyndep prokram seng kam lajong

0

Nongpoh, Kyllalyngkot 16 : Ka Aide et Action kawei naki kynhun kaba ju ai jinghikai ïaki samla kiba la pep skul shiteng por bad kumjuh ruh ïaki kynhun SHGs ha Ri-Bhoi District, kala pynlong da ka prokram ba kyrpang ban ai jinghikai ïa ki dkhot jong ki SHG bapher bapher na Ri-Bhoi District haka jingsnohkti lang bad ka Bhoirymbong C&RD Block halor ka rukom seng kam lajong ne Enterprise Promotion for Sustainable Development ryngkat bad ka jingïatreilang bad ka Meghalaya State Rural Livelihood Mission (MSRLS).
Ka thong jong katei ka prokram ai jinghikai ka long ban kyntiew ïaki nongseng kam seng jam khamtam ki kynhun SHGs ba kin lah ban seng kam bad ban ïeng hala ki jong ki kjat naka bynta ban kyrshan ïaka iing ka sem bad khamtam ki para longkmie haki kynhun SHGs bapher bapher ba ki don, ha kaba kumba 70 ngut ki longkmie kila ioh ruh ïaki syrnod naka Aide et Action hadien ba kila pyndep ïa katei ka prokram ai jinghikai.
Ha katei ka sngi ka jingsam ïaki syrnod sha kitei ki longkmie la don ryngkat ruh da ka kong Banri Khongjee Young Professional na MSRLS, Bah H Shylla Network Development Manager ka Aide et Action, Bah F Dkhar Cluster Co-ordinator, kong Lanosha Sun Field Officer ka Aide et Action bad kiwei kiwei ki riew rangbah.
Haba kren ha katei ka sngi naka liang kitei ki nongïalam jong ka Aide et Action kila pynpaw ka jingsngewkmen kaba khraw hadien ba katei ka project kala long kaba ïaid beit ïaid ryntih bad ba ki longkmie kila wan ban shim bynta shitrhem naka bynta ka jingmyntoi ba ki lah ban ioh kum haka sengkam sengjam la jong bad kiwei kiwei kiba lah ban kyntiew ïaki longkmie khamtam haki kynhun SHGs ba ki don.
Shuh shuh kila ong ba katei ka project kan long ka jingkyrkhu ïaki longkmie kiba la pyndep ïaki prokram ai jinghikai ba kin lah ban ieng hala ki jong ki kjat kumba ka sorkar ka ju kyrshan lyngba ka MSRLS ïaki longkmie haki kynhun SHG ba ki don bad kane ka project jong ka Aide et Action ka long kum ka prokram hikai ïaki longkmie ba kin dang lah ban bteng bad pyntyllun ïaki kam jong ki ba ki trei bad khamtam ban ieng hala ki jong ki kjat.

Leave A Reply

Your email address will not be published.