Nongpoh, Kylla Lyngkot 16: U Bah Shemphang Lyngdoh kyrtong ka party NPP u ban sa ïakhun na Mawhati Constituency mynta ka sngi u la leit ban aiti syndon da ka Work Order kaba T.15, 73, 800/- sha ka skul RCLP School Mawshut kaba don ha Mawhati Constituency naka bynta ban pynbha ïaki kamra klas bala mang pisa lyngba ka Chief Minister Special Development Fund.
Haba kren ha katei ka sngi naka liang u Bah Shemphang Lyngdoh kum uwei naki riew rangbah u ba la thmu ruh ban aireng ha kane ka elekshon ban wan u la pynpaw ba u dap da ka jingsngewkmen kaba khraw hadien ka jingshimkhia jong u Myntri Rangbah ka jylla u Conrad Sangma ban pynmang skhim naka bynta katei ka skul kaba la donkam eh ka jingïarap bad u bym shym la kyrngah ïaka jingkyrpad.
U la ong ruh ba ka Mawshut RCLP School ka dei kawei naki shlem ai jinghikai kaba ju mad jingeh haki snem bala leit noh namar ka jingkhapngiah jong ki kamra klas bad ka jingnang kiew jong ki khynnah katba nang mih ki snem, bad kum ki bor pynïaid skul ki shem jingeh ban pynrung klas khambun ïaki khynnah namar ka jinglong jingman jong ka skul.
“Hynrei lyngba katei ka jingpynmang tyngka ban shna pynbha ïa katei ka skul kum uwei naki riew rangbah ba don ka jingkitkhlieh nga ngeit skhem ba kan long ka jingkyrkhu ïa kiba bun ki khynnah skul ha katei ka thaiñ ba kin ioh ban rung klas ha katei ka skul hadien bala dep ban shna pynheh bad pynbha ka ban long ruh kum kawei naki shlem hikai ba kongsan ha katei ka thaiñ, khamtam ba ki nonghikai kin dang lah ban kyntiew ïa katei ka skul haka liang ka pule ka puthi” la ong u Bah Shemphang.
Naka liang u Bah Shemphang u la ai ruh ka jingkhublei ba kyrpang ïa u Myntri Rangbah ka jylla u Conrad Sangma halor ka jingshimkhia jong u ban pynmang skhim ïa katei ka skul bad u bym shym la kyrngah ïaka jingkyrpad jong u naka bynta ka jingdonkam jong katei ka skul bad ban pynsuk ïaki kmie ki kpa ha katei ka thaiñ ba kim donkam ban phah skul ïaki khun sha jngai.