Shillong, Rymphang 03 : U Myntri Rangbah ka Jylla Conrad K Sangma ha ka sngi Saitjaiñ u la leit ban shim bynta ha ka jingkynduh lang jong ki Koch ba ju pynlong shisien shisnem ïa kaba la tip kum ka 54th Annual Conference jong ka Meghalaya Koch Assocïation ba la pynlong ha Jatrakhona, South Garo Hills, Meghalaya.
Haba kren ha ka jingïalang, u Myntri Rangbah u la ai ka jingïaroh ïa ki nongïalam bad ki dkhot jong ka ka Meghalaya Koch Assocïation kiba la lah ha kine ki 54 snem ban pynlong ïa katei ka lympung jingïakynduh lang.
“Kane kadei ka dak jong ka jingieid bad jingïatylli jongphi ha ka imlang sahlang,” ong u Myntri Rangbah da kaba ai mynsiem ba kin ïai bteng ban pynlong ïa kum kine ki jingkynduh lang man ka por na ka bynta ban ïada ïa ka tynrai jong ki Koch bad wanrah ka jingïajan ha ka riti distur, ka imlang sahlang bad ka jingïatylli.
Nalorkata u Myntri Rangbah u la ong ba katei ka jingkynduh lang kan pyni ruh ïa ka tynrai jong ki Koch bad kan wanrah ruh ïa ka jingïalong kawei ha baroh ki lïang khamtam ha ka pule puthi bad ka jingburom lang ïa ka kolshor bapher bapher ba don ha ka jylla.
U la kular ruh ba ka sorkar kan ai ka jingkyrshan ban buh ïa ki cultural centre ban pynneh pynsah ïa ka tynrai jong ki.
Da kaba pdïang ïa ka jingai jingmut jong ka Meghalaya Koch Assocïation ban kyntiew ïa ka Ktien Koch, Hajong bad kiwei kiwei ha ki skul ha ka jaka ka ktien Assamese bad Bengali, u Myntri Rangbah u la ong, “Wat ha ka New Education Policy ka kdew ban kham khein kor ïa ki ktien lajong bad kyntiew ïa ki khamtam haba ka Indïa kadei ka ri kaba don shibun ki jait ktien bapher bapher.”
Shuh shuh u la kular ruh ïa ka Koch Assocïation ban ïarap ïa katei ka jingangnud jong ki.
La donlang ruh ha kane ka sngi naduh u MLA ka Salmanpara, u Ïan Botham K Sangma, MLA Baghmara Kartush R Marak, MLA Chokpok Sengchim N Sangma nalor ki MDC na katei ka thaiñ.
