Shillong, Rymphang, 03: Ka Khasi Students Union (KSU) Jaïaw Circle ha ka sngi Saitjaiñ ka la ai khusnam ïa ki samla pule kiba shong basah ha ki shnong kiba dang hap hapoh ka jylli jong ka Jaïaw Pyllun.
Ki don 80 ngut ki khynnah rit bad ki samla pule shynrang bad kynthei kiba la shah pynkup burom ha kane ka sngi naduh ka kyrdan Class-IV bad kumjuh ruh ïa kiba pas bha ha ka eksamin SSLC bad HSSLC, Graduate, Post Graduate bad ki PhD.
U Chairman ka North East Students Organisation (NESO) Bah Samuel Jyrwa uba la long kum u Kongsan haba kren ha kane ka sngi, u la kyntu ïa ki heprit bad ïa ki samla pule ba kin long kiba trei shitom khnang ba kin long ka lawei kaba shngaiñ ïa ka jylla bad ïa ka jaidbynriew.
La sakhi lang ha kane ka sngi, da u Asst Education Secretary ka KSU Sengkmie u samla Shalkitbok Kharbani, ki Rangbah Shnong jong ki shnong bapher bapher kiba hap hapoh ka Jaïaw Pyllun bad ki kmie ki kpa jong ki khynnah bad ki samla ba la shah jied ban ïoh pdiang ïa ka khusnam.
