Shillong, Kyllalyngkot 17 : Ka Kynhun Myntri kaba la ïa kynduh mynta ka sngi ka la kyntiew ïa ka Contingency Fund jongka sorkar na ka 1300 klur tyngka sha ka 1800 klur tyngka.
Haba kren ha ki nongthoh khubor u Myntri Rangbah ka jylla u Conrad K Sangma u la ong “ ïa kane ka pisa la kyntiew sha ka 1800 klur khnang baka sorkar kan lah ban pyndonkam katba ym pat dep long ka dorbar mang tyngka”.
U la ïathuh ba ka sorkar jylla kan sa ïoh pdiang sa 100 klur tyngka na ka sorkar pdeng na ka bynta ka MGNREGS. “ ïa kane ruh la kynthup lang ha kane ka mang tyngka namar ka pisa kan sa wan kham hadien kumta katba ym pat wan ka pisa ka sorkar kan dang pynlut shwa na kane ka pisa ba la kyntiew shuh shuh” ong u Myntri Rangbah.
“ Ngi hap ruh ban kyrshan ruh ïa ka MeECL mynta u snem namar tang ha une u snem mang tyngka 2022-23 ka sorkar ka la pynlut palat 400 klur tyngka tang na ka bynta ka MeECL ba kan lah ban pynïaid shakhmat ïa ki kam.Mynta ruh ka sorkar ka dang donkam ban ïoh pisa ban ïarap shuh shuh ïaka MeECL. Hooid ka pisa ka don tangba khlem mang lypa na ka bynta kane na kata ka daw la hap ban kyntiew ïaka Contingency Fund” ong u Myntri Rangbah.
