Kynthah biang u MLA ka VPP ïa ka sorkar halor ka jingai jaka biang ïa ki harijan

Shillong, Nohprah 12: Hadien ka jingther tyngeh u Symbud Myntri Rangbah u Bah Prestone Tynsong ïa u MLA ka North Shillong bad ïa ka Seng VPP namar ka jingpyrshah ban ai jaka biang sa 1.4 akar ïa ki Hajrijan ha jaka jong ka Shillong Municipal Board, u Bah Adelbert Nongrum mynta ka sngi ruh u la kynthah biang tdaiñ ïa u Bah Prestone bad ïa ka sorkar hi baroh kawei.
Lyngba ka jingkren da ka Video ba la phah mynta ka sngi, u Bah Adelbert u la ong ba ka jingkynnoh u Bah Prestone ba ka VPP kam dei ban leh politik ne ïalam bakla ïa u paidbah halor ka them metor. Hynrei u MLA ka VPP na North Shillong, u la ong ba u paidbah i tip bad bishar mano ba ïalam bakla, haba u Bah Tynsong, u la ong na um don por ban batai ne pynshai bniah ïa kane ka bynta jong ka jingai jaka ïa ki Harijan kiba shong ba sah ha Them ïew Mawlong.
“Lada u Bah Prestone uba long u Myntri bad Chairman ka High Level Committee um don por ban batai, manao pat ban batai?”, la ong u Bah Adelbert.
Shuh shuh u MLA ka VPP u la ong ruh ba um don jingpyrshah ban pynkynriah ïa kine kiba shong ha Them ïawlong sha jaka jong ka Municipal, hynrei kaei kaba u pyshah ka long balei ba hap ban ai jaka biang ïa ki sa 1.4 akar. Balei ym ïasam ïa ki sha kiwei pat ki tnad treikam ba kin pynbiang ki jaka sah na ka bynta jong ki. “Ka jaka ka long kaba kordor na ka bynta u paid Hynñiewtrep, ym lah ban shu pyndonkam ïa ki briew ki bym don hok satia ban ïoh”, u la ong.
U Bah Nongrum, u la ther tyngeh ruh ïa u nongsaid aiñ uba la pyntieng kohtympan ban pyntreikam da ka MPDA ïa kito kiba pynwit namar ba ka Land Transfer Act kam treikam satia ha ki jaka sorkar ne kita ki Non Schedule Area. “Nga kyntu ïa une u nongsaid aiñ ba un nym sngew stad than, namarba ha kawei ka sngi ka aiñ kan treikam na ka bynta jong u ruh”, la ong u MLA North Shillong.