Kynnoh khlem nongrim u Nongkhaii bar jylla ba lum pisa u Synshar Khymdeit ha kyrteng ka HNLC

Shillong, Jylliew 04 : U Nongkhaïi bar jylla ba kyrteng u A Laskar u dei u briew uba kynnoh donkti ïa u Synshar Khymdeit ba na Mawhati, ba u dei u Area Collector ba sam shithi dawa pisa bad lum pisa ha ka kyrteng ka Hynniewtrep National Liberation Council (HNLC). Haba pyrshang ban tohkit bniah la lap ba kane ka jingkynnoh ka long ka bym shisha bad kaba khlem nongrim namar kum une u A.Laskar ym don ba tip bad ithuh da kiwei ki nongkhaïi ba shong dukan ha ki thaiñ Khyndai Lad bad Police Bazar.
Dang shen ka HNLC ruh kala kyntait ïa ka jingdonkti jong une u samla da kaba ong ba ki briew ba shun ïa ka seng, kila pyndonkam ïa ka kyrteng Synshar na ka bynta ka jingmyntoi shimet.
Kane ka jingkynoh ïa u Synshar kala mih pyrthei biang hadien ka jingpoi jong kawei ka shithi ba la phah sha u President ka Shillong Press Club ha ka 17 tarik Iaiong, 2025 ba la soi da une u A Laskar.
Hadien ka jingkyntait jong ka HNLC ïa ka jingdonkti u Synshar Khymdeit, ki lad pathai khubor kila pynlong ïa ka jingtohkit kaba bniah ïa ka thymmei jong kane ka shithi bad la shem ba u nongphah u don ïa ka jingthmu kaba sniew ban pynjah burom ïa u Synshar.
Ha ka shithi, u briew bala pynithuh ïalade kum u A.Laskar, u nongkhaïi ba don dukan ha Khyndailad, ula kubur ba ula shong kurim ïa kawei ka kynthei Khasi.
U Laskar ula pynpaw ruh ba ula ïoh pdiang ïa ka shithi dawa na ki arngut ki nonglum pisa ka HNLC-u Synshar Khymdeit bad u Wallamjingsuk Barik myn ha ka 28 tarik Kyllalyngkot 2022 ba dawa ïa u ban siew T4.40 lak kum ka khajna.
Kane kam dei ka sien kaba nyngkong ba u Synshar Khymdeit ula shah kynnoh ha kum kane ka kam. Ha u 2023, ula shah kynnoh kumjuh bad ula hap ban mih ban ïakren bad ki lad pathai khubor ban pynshai ba u shu shah kynnoh thok ïa kiei kiei baroh.